Kyrpad ka FKJGP&MPUF ba ym dei ban pynlong ïa ki jingïakhih ha ka sngi ïew ha Khliehriat

Khliehriat jylliew 17: Khnang ba kan nym don kano kano ka jingshah ktah ïa ka leit ka wan jong ki paidbah bad kito kiba leit ïew, ki ar tylli ki sengbhalang napoh East Jaiñtia, ka Federation of Khasi Jaiñtia and Garo People bad ka Meghalaya People United Front, ki buh ka jing kyrpad bad jing kyntu ïa kino kino ki kynhun ba kim dei ban pynlong kano kano ka jingiakhih ha ka sngi ba long ïew pyngkat ha Khliehriat.
“Ki jingiakhih kum ki jing shong kyllaiñ myngor ha surokbah NH6 ka ktah ïa ka leit ka wan, ka kamai kajih ka ktah ïa ki paidbah naduh kiba ñiah Taxi kamai, ki kali Tourist ba kamai bad ka jingiakhih ha sngi ïew ka ktah ruh ïa ka die ka thied jong ki paidbah, namar ha kaba kum kane ka por bym donkam donjam lada ki paidbah ki duh ban kamai laitluid ha ka Sngi ïew kin shah ktah namar ba ka kham bha ka kamai kajih tang ha ki sngi ïew, te lada don ki jingiakhih ha sngi ïew kan long ka jingduh nong kaba khraw bha ïa ki paidbah” ong u kyrwoh.
Na ka liang kine ki arseng ki kyrpad ruh ïa ki bor synshar district jong ka East Jaiñtia Hills District ba kim dei ban shah lane ban ai jingbit ban pynlong kino kino ki jingiakhih ha ki sngi ba long ïew ha Khliehriat kaba la ju tip ruh kum ka ïew Pangkat.
Sa shisien ki arseng ki la buh ruh ka jing kyrpad ba kino kino ki kynhun kiba iakhih ha kaba iadei bad u dewïong ki dei iakhih naduh ka mynsien bad kim dei ban shet kylla ïa u paidbah lane kim dei ban pyrkhat ïa ka jingmytoi shimet namarba ka kam dewïong ka dei ka kam iap kam im jong ki paidbah, ka FKJGP bad ka MPUF ka hap ban kren ïa kane namar ba naduh u snem 2014 la khang ïa u dewïong hynrei ym don satia kano kano ka dak ba ki paidbah kin ioh sdang biang ïa ka kam dewïong, namar ba ki paidbah hi ki shu kut tang ha ki jing shah pynbiej ba bun jait” pynkut u kyrwoh na u bah Michal Chyrmang President FKJGP-Khliehriat Circle bad u bah Kyrshan Blah, President MPUF-East Jaintia Hills District.