Thmu ka sorkar ban pynpra noh ïa ka barim ban tei thymmai da kaba heh bad skhem

Shillong, Jylliew 17: Ka Sorkar Jylla ka la rai ban pynpra noh ïa ka District Library-cum-Auditorium kaba don ha Mynthong, Jowai, bad yn tyrwa ban tei thymmai noh da kawei pat kaba kham skhem bad kham heh bad kham kylluid na ka bynta ka jingdonkam jong ki paidbah kaba man ka por.
Ïa kane la ïathuh da u Myntri ka tnad Arts and Culture ka sorkar jylla, Bah Sanbor Shullai hadien ba ki la dep ban jurip ïa katei ka jaka treikam ryngkat ka jingdonlang u MLA ka thain bad Myntri Sorkar, Bah Wailad Shylla, ki ophisar na ka tnad, ki nongïalam shnong bad kiwei kiwei.
Haba kren bad ki lad pathai khubor, u Bah Sanbor u la ïathuh ba ka jingwan jurip jong ki ka dei hadien ba ki la ïoh jingtip bad ki kaiphod kiba kdew ba ka jingtei ba mynshwa kam shym la don ïa ka mawnongrim kaba biang bad kumta ka don ka jingsyier lada bteng ban pyndonkam ïa ka.
“Hadien ba ngi la peit bniah ïa ka jingskhem jong kane ka jingtei, ngi sngew ba kam long shuh kaba dei ban pyndonkam. Kumta ka sorkar ka la rai ban pynpra noh ïa ka bad ban wanrah da ka projek kaba thymmai,” la ong u Bah Sanbor.
U la ong ruh ba katkum ka jingbit ban shna iing ba thymmai mynta ka long haduh san mala (G+5). Hynrei ïa mynta u ong pat ba katba dang pynkhreh ïa ka projek kan shong ha ka DPR bad ka jingmynjur jong ki tnat ba dei peit.
“Ïa ka bynta kaba shapoh yn pynlong kum ka jaka pynïeng kali paidbah, katba ki mala ba shaneng kin kynthup ïa ka auditorium, ki jaka jingïalang bad kiwei pat ki jingdonkam paidbah,” u la ong.
U Myntri u la ïathuh ba hadien ba la dep pynkhreh ïa ka DPR, ka sorkar jylla kan phah ïa ka jingtyrwa sha ka Ministry of Arts & Culture jong ka Sorkar Pdeng ban wad jingïarap pisa. U ong ruh ba hadien kane ma u kum u Myntri ka tnad ryngkat u MLA ka thain bad naka liang ka sorkar kin sa leit ban kynduh ïa u Myntri ka Sorkar Pdeng ba dei peit ïa katei ka tnad.
“Ka jinglut jingsep jong kane ka projek kaba thymmai ka lah ban kot haduh 70 haduh 80 klur. Ngi kyrmen ba da ka jingïatreilang bad ka Sorkar Pdeng, ngin lah ban ïoh ïa ka jingïarap kaba donkam ban pyntyllun ïa kane ka projek,” u la ong da kaba bynrap ba khlem artatien ka sorkar pdeng kan ai beit ka jingïarap khamtam haba ma u, u dei u MLA na ka party kaba don ha ka bor synshar ha ka sorkar pdeng ba ïalam da u Narendra Modi.
Ha kajuh ka por, u Bah Wailadmiki Shylla u la ong ba ka Auditorium kaba mynta kam ïahap shuh bad ki jingdonkam jong kane ka juk, namar ka la rim bha bad ki bynta jong ka ruh kim long shuh kiba skhem.
U la pynpaw ruh ba ka Jowai ka dang long ka pdeng jong ka kolshor drama ha rilum Jaiñtia, ha kaba bun ki nongshong shnong ki dang ïai sngewtynnad ban peit bad shim bynta ha ki jingïalehkai drama.
La ïathuh ba haduh mynta ka don ka jinglong kaba kyrpang ha Jowai namar ki paidbah ki dang sngewtynnad ban leit peitkai ïa ki jingïalehkai drama. “Don ki por ba la shu hap ban shu pynkhalai nusib mano ban ïoh jaka shong ban leit peitkai tang namar ka jingrit ka jaka shong peitkai ki paidbah,” u la ong.
Kumta, halor kane u la kyntu ïa u Myntri ban shimkhia lang khnang ba kin ïoh da ka auditorium kaba thymmai, kaba heh bad kaba kylluid khnang ba kin dang lah ban bteng ïa katei ka jingak drama kaba long shi bynta ban pynneh pynsah bad kyntiew shuh shuh ïa ka riti dustur bad ka kolshor tynrai kaba la don naduh ka por ki mynbarim.