Tyngshaiñ ki nongïalehkai ka Meghalaya ha ka UWW Pankration & Amateur MMA Asian & Oceania C’ship 2026
SHILLONG, Jylliew 12: Ka All Meghalaya Traditional Wrestling & Pankration Association (AMTWPA) ka sngew sarong ban pynbna ïa ka jingïalehkai ba dei ban ai jingïaroh jong ki nongïalehkai ka Meghalaya ha ka lympung UWW Pankration & Amateur MMA Asian & Oceania Championship 2026, kaba la long ha Da Nang, Vietnam, naduh ka 07 haduh ka 09 tarik u Jylliew.
Kiba mihkhmat ïa ka India ha ka rynsan ïakop International ki long u Francis R. R. Songthiang (Senior 66 kg) bad u Bankerlang Myrthong (U-20 57 kg), bad la synran lang da u D.Ranee kum u coach.
Ki la long shi bynta jong ka kynhun India kaba kynthup ïa ki nongïalehkai na ki jylla bad ki thaiñ bapher bapher jong ka ri kiba la mihkhmat da ka jingsngew sarong ïa ka ri ha kane ka lympung ïalehkai.
Baroh arngut ki la pyni ïa ka jingtbit, ka jingkut jingmut, bad ïa ka sap ïalehkai ba kyrpang haba ïakhun pyrshah ïa ki nongïalehkai ba kynsai na kylleng ka dewbah Asia bad Oceania.
U Bankerlang Myrthong u la ïoh ban khur ïa ka takma rupa ha ka kyrdan U-20 (57 kg) kaba la wanrah ïa ka burom ïa ka ri bad pynlong ïa ka jylla Meghalaya ban sngew sarong.
Katba na ka liang jong u Francis R. R. Songthiang, watla u khlem shym la lah ban poi sha ka thong, hynrei ma u ruh u la wanrah ïa ka jingïalehkai kaba dei ban ïaroh, da kaba pyni ïa ka sap bad ka jingtbit jong ki nongïalehkai ka Meghalaya ha ka rynsan ïakop bar ri.
Ka President jong ka AMTWPA, ka kong Anita Songthiang ka la ai khublei kyrpang ïa ki nongïalehkai, u coach, bad ïa ka kynhun baroh kawei na ka bynta ka jinglah ban ïalehkai bha.
“Kane ka jingjop ka pynpaw ïa ka jingtrei shitom, ka jinglong ryntih, bad ka jingaiti lut jong ki nongïalehkai bad ka long kum ka jingai mynsiem ïa ki pateng kiba dang wan,” ka la bynrap.
Ka AMTWPA ka ai khublei ruh ïa baroh ki nongïalehkai na ki bynta bapher bapher jong ka Ri India, da kaba pynpaw ba “ka AMTWPA, ryngkat bad ka Meghalaya School of Martial Arts (MSMA), ka kitbok kitrwiang ïa baroh ki nongïalehkai bad ki coach ba kin dang ïai bteng ban jop ha ki jingïalehkai ban sa wan bad ban dang ïai neh ban kyntiew ïa ki jingïalehkai ha Meghalaya.
Kane ka long katkum ka kyrwoh na ka All Meghalaya Traditional Wrestling & Pankration Association (AMTWPA).