Ka shnong Mawlaisyiem ha kaba nyngkong ka dei tang ka jaka sharai masi jong ki nong Parïong

Nongstoiñ, Jylliew 11: Ka long kaei ka ei kaba sngew tynnad ban tip ba ka shnong Mawlaisyiem ka dei kawei na ki shnong kiba don ïa ki dak ki shin bad ki nongmuna kiba pyni ba ki jingshisha kat kum ka kyrteng jong ka shnong.
Ha kaba ïadei bad ka kyrteng jong katei ka shnong u nongthohkhubor jong u Mawphor ha kane ka sngi palei ka 11 tarik Jylliew u la hiar sha katei ka shnong ban ban ïakynduh ïa ki riew tymmen bad ban wad jingtip ha kaba ïadei bad ka jingjer kyrteng ia katei ka shnong ka Mawlaisyiem.
Ha katei ka sngi la ïoh ban ïakren bnaih bad u babu Roiland Hujon uwei na ki riew tymmen na katei ka shnong ha kaba u la ïathuh ba kumba phraphew snem mynshuwa katei ka shnong Mawlaisyiem kam dei satia ka shnong hynrei ka dei tang ka lum suda bad ka dei ruh ka jaka kaba ki nongshong shnong na Parïong ki pynlong kum ka jaka sharai masi bad ka jaka rep.
U la ïathuh ruh ba namar ba ka shnong Parïong ka jngai ki nong shong shnong kiba wan rep ha katei ka jaka ki sngew shitom ban wan rwing ki la sher dara ha katei ka jaka bad hadien katto katne por ki don lai ngut ki tymmen kiba na ka shnong Parïong ka Presimai Hujon, ka Plesimai Hujon bad ka Thaïon Parïong ki dei kiba la sdang ban wan shna ïng ha katei ka jaka ha syndah jong ki mawpud jong ki lai tylli ki hima kata ka hima Mawïang, hima Nobosohphoh bad ka hima Myrïaw bad dei na ka jingdon jong kitei ki mawpud mawsam jong ki lai hima ba la jer kyrteng ka shnong Mawlaisyiem.
Ka long ruh kab sngew tynnad ba katkum ka jingïathuh jong u babu Roiland la ong ba ha ka por ba kitei ki lai tylli ki long ïng ki dang sdang ban wan buhaio shnong ha katei ka jaka ka kidei kiba duk haduh katta katta bad ban pynkdang ïa ki khun ki kti ki la hap ban leit kheit da u jhur jatira na duh Mawphanlur.
Ha kaba ïadei bad ka jing kiew jong ka jingdon ki nongshong shnong utei u babu u la ïathuh ba haduh kine ki sngi ki la don haduh shispah khathynñw tylli ki long ïng.
Nalor kata u la ïathuh ruh ba ha kaba ïadei bad ka roi ka par ruh ka tei ka shnognka la kiew sted bha namar ba ïa ka surok la dep ïoh naduh u snem 2002 ha ka por ba u bah Tuberlin Lyngdoh u dang long u MLA jong ka Parïong constituency bad la plie ha ka por ba ka balang Presbyterian Laitkseh Jingïaseng Samla ka pdiang ïa ka jingïaseng Samla jong ka KJP Synod Serpngi.
U la ïathuh ruh ba ïa ka bording eletrik bad ka umbam umdih ruh la dep ïoh naduh ka por ba u bah Tuberlin Lyngdoh u dang long u MLA.
Ha kaba ïadei bad ki mawpud mawsam jong ki hma bad ki shnong ki thaw utei u babu u la ong ba ka por ka la dei ba ki Syiem bad ki nongsynshar jong ki hima bapher bap her bad ruh ki shnong ki thaw ki dei ban da pynthikna ïa ki pud ki sam da kaba sieh thikna ïa ki maw pud ha ki jaka kiba dei ban sieh bad ba ki dei ban long kiba kham jrong bad ruh ba ki dei ban da pynthymmai man la ka por khnag ba kan ym don kano kano ka jingïaknieh ne kyntur pud bad ki mawpud maw sam ruh kim dei ban ïa jngai than hynrei ki dei ban long marjan khnang ba ki khun ki ksiew pateng la pteng kin tip ïa ka nongrim jong ki pud ki sam jong ki hima ba ki shong bad wat ki jaka jong ki riew shimet ruh ki dei ban don ïa ki mawpud maw sam kiba thikna da ka jingïatip bad mynjur lang jong ki para trai jaka khnang ban lait na ka jingïa tam pud uwei ïa uwei pat.