SHILLONG, Jylliew 11: Ka Mawshbuit SC, ka Nongkseh United FC bad ka Nongpiur SC ki la ïoh mad jingjop ha la ki jong ki jingïalehkai jong ka Group D ha ka lympung U-20 4th Division 2026 ba la pynïaid da ka Shillong Sports Association, hynne ka sngi Palei ha Polo.
Ka Mawshbuit SC ka la pynliem noh da 3-1 ïa ka New Challenger FC. U Romario Mawrie (14 & 62’min) bad u Aibanjop Sun (40’) ki la pynkhihjar na ka bynta ka Mawshbuit, katba u Dame Hajong Mawlieh (26’) u la thep kawei na bynta ka New Challenger.
Nangta ka Nongkseh United FC ka la jop 1-0 ïa ka Mawphlang SC, lyngba ka kol jong u Gerrad Dakerlang Sun ha ka minit kaba 38.
Ha MFA Ground, ka Nongpiur ka la jop da 3-0 ïa ka Pynthorbah SC, lyngba ki kol jong u Rishanskhem Langstieh (43’), u Mepynsngewbha Nongsiej (78’) bad u Andrew Tangsong (80+6’).
Ki jingïalehkai ha kane ka sngi Thohdieng (12.06.2026); Por 1 baje mynsngi, ka Diengpasoh SC pyrshah ïa ka Mawnianglah Youth SC, Por 4 baje nohphai sngi, ka Umiew S&CO pyrshah ïa ka Laitkroh SC ha SSA Stadium. Nangta ha MFA Ground, Por 1 baje mynsngi ka Seila Sap F&CC kan aireng pyrshah ïa ka Summit Academy.
