31 tylli ki kor komputer sam ka Umling Block sha ki AEC ban pynkhlaiñ ïa ka rukom treikam jong ki shnong

Nongpoh, Jylliew 08: Kum shi bynta ban pynkhlaiñ ïaka rukom treikam jong ki shnong bad ban kyntiew ïa ka jingpyntreikam ïa ki skhim pynroi, ka ophis jong u Block Development Officer (BDO), Umling C&RD Block, lyngba ka skhim Rashtriya Gram Swaraj Abhiyan (RGSA), mynta ka sngi ka la sam ïa 31 tylli ki kor computer sha 31 tylli ki Area Employment Council (AEC) kiba hap hapoh ka Nongpoh Constituency.
Ïa kine ki kor computer la aiti da u MLA ka Nongpoh Constituency, Bah Mayralborn Syiem, ha ka jingïadonlang ka Kong Lalchandami Marak, Junior Rural Development Officer (JRDO) ka Umling Block, ryngkat bad ki ophisar, ki nongtrei jong ka Block lem bad ki rangbah shnong na ki shnong bapher bapher.
Ka Rashtriya Gram Swaraj Abhiyan (RGSA) ka dei ka skhim ba la kyrshan da ka sorkar pdeng lyngba ka Ministry of Panchayati Raj, kaba thmu ban pynkhlaiñ ïa ka jingtreikam jong ki shnong khnang ba kin lah ban pyntreikam kham paka ïa ki skhim bapher bapher jong ka sorkar jylla bad ka sorkar pdeng.
Nalor kata, lyngba kane ka skhim la angnud ruh ban kyntiew ïa ka roi ka par ha ki thaiñ nongkyndong, ban pynbha ïa ka jingshakri paidbah bad ban kyrshan ïa ki shnong ba kin lah ban kynjoh sha ki thong jong ka Sustainable Development Goals (SDGs).
Ha kane ka prokram, la aiti ïaki kor computer sha ki 31 tylli ki AEC kiba kdup ïa bun tylli ki shnong ha ka Constituency. La ong ba kine ki kor komputer kin long ka jingïarap kaba donkam ha ka jingïaid beit ïaid ryntih jong ki kam shnong kam thaw, ka jinglum jingtip bad ka jingpyntyllun ïa ki kam pynroi jong ki shnong katkum ka thong bad ka jingthmu jong ka skhim RGSA.
Ki paidbah bad ki nongïalam shnong kiba la shim bynta ha kane ka sngi ki la pynpaw ïa ka jingsngewkmen bad ka jingkyrmen ba ka jingai ïa kine ki kor komputer kan ïarap shibun ban pynsted bad pynsuk ïa ka rukom treikam jong ki shnong.