“Ki samla ka India ki long ka bor ka ri & ki long ki bynta pdeng ban pynurlong ka jingthmu ka Viksit Bharat”

Dr. Dr. Mansukh Mandaviya

U Myntri Sorkar Pdeng ba dei khmih ïa ka Tnad Youth Affairs and Sports Dr. Mansukh Mandaviya, ryngkat bad ka Myntri Rangbah jong ka Delhi ka Rekha Gupta ki la ai jingkren ha ka ‘Youth for Viksit Bharat: MY Bharat Youth Convention’ ha Thyagaraj Sports Complex ha ka nongbah jong ka ri mynta ka sngi.
Ka jingïalang ka la wanrah lang ïa palat 6,000 ngut ki samla kiba ïashim bynta na kylleng ka ri, kiba mihkhmat na ki jaitbynriew bapher bapher kynthup ïa ki samla pule, ki samla riew shemphang, ki samla kynthei, ki nongseng kam seng jam, ki nongpynmih prokram, ki nongsaiñdur thymmai, ki nongïalam kiba dang sdang paw bad ki nongjop.
Ka la pyni ïa ka bynta ba wanrah jingkylla jong ki samla ha ka jingtei ïa ka ri bad ka jingïaid lynti jong ka India ban long ka ri kaba la kiew shuwa u snem 2047.
Ki riew pawkhmat ba kynthup ïa ka MLA bad ka nongrwai ka Maithili Thakur, u aktor Vikrant Massey, u nongseng kam seng jam u Aman Gupta, bad u nongïalehkai kriket ka ri India u Jitesh Sharma ki la ïakren bad ki nongtrei mon sngewbha jong ka MY Bharat NSS bad ïasam ïa ki jingshem jong ki, da kaba pynshlur ïa ki samla ba kin beh ïa ka jingtbit bad ban noh synniang kaba don jingmut sha ka roi ka par jong ka ri.
Ka Youth Convention, kaba la sakhi ïa ka jingïashim bynta jong palat 6,000 ngut ki samla, ka la pyni ïa ki sienjam ba kongsan ba la shim ban ïatreilang bad ki samla ha kylleng ka ri.
Ha ka jingai jingkren jong u, u Myntri Sorkar Pdeng ba dei khmih ïa ka Tnad Youth Affairs and Sports u Dr.Mandaviya u la ban jur ba ki samla jong ka India ki dei ka bor ba khraw tam jong ka ri bad ki long ki bynta pdeng ban pynurlong ïa ka jingthmu jong ka Viksit Bharat, da kaba ban jur ïa ka jingmyntoi jong ka India ha ka liang ka jingbun briew, ha kaba jan 65 percent na ki nongshong shnong jong ka kidei kiba hapoh ka rta kaba 35 snem.
“Ki samla kidei ka bor jong ngi, ka jingsarong jong ngi, ka jingkut jingmut jong ngi bad ka lawei jong ngi. Hapoh ka jingïalam jong u Myntri Rangbahduh ka ri u Narendra Modi, la plie ïa ki lad ki lynti ki bym pat ju don mynno mynno na ka bynta ki samla jong ka ri ban saindur thymmai, ban leh bha bad ban noh synñiang sha ka jingtei ïa ka ri. La ka long ha ki startup, ki kam ïalehkai, ki kam shakri paidbah, ka jingseng kam seng kam ne ki kam saindur, ki samla jong ka ri ki pyni ia ki sap jong ki bad kyntiew ïa ka kyrdan jong ka ri ha ka pyrthei,” u la ong.
U Dr. Mandaviya u la kren ruh shaphang ki sienjam jong ka MY Bharat, ban kyntiew bad ïalam lynti ïa ka sap jong ki samla sha ka jingtei ïa ka ri.
U Myntri u la ïaroh ruh ïa ka jingjop ba dang shen jong ka MY Bharat ha ka Guinness World Record bad u la kyntu ïa ki samla ba kin ïashim bynta shitrhem ha ki prokram jong ka rynsan, ki lad trei mon sngewbha bad ki sienjam ban tei ïa ka ri.
Haba kyntu ïa ki samla ban ithuh ïa la ka jong ka sap bad ban trei borbah ban long kiba tbit, u Dr. Mandaviya u la ong, “Ka por kadei jong ki samla. U Myntri Rangbahduh u Narendra Modi u la ïohi ïa ka Viksit Bharat kaba la pynwandur da ki jingmut jingpyrkhat, ki jingsaiñdur thymmai bad ki jingangnud jong ki samla jong ka ri. Baroh, ngi dei ban tei ïa ka India kaba lah ban ïakhun, kaba sngewskhem bad kaba lah ban kyrshan hi dalade kaba pynurlong ïa ki jingangnud jong ki 140 klur ngut ki nongshong shnong.”
Haba ai jingkren ha kane ka jingïalang, ka Myntri Rangbah jong ka Delhi ka Rekha Gupta ka la ong ba ki samla jong ka India ki long kiba la pynkhreh ban ïalam ïa ka ri sha ki kyrdan kiba kham heh lyngba ka sap, ka jingkut jingmut, bad ka jingtrei shitom jong ki.
Haba ban jur ïa ka bynta ba kongsan jong ki samla ha kaba tei ïa ka ri, ka la ong ba ki samla jong ka ri ki long kiba trei shitom, kiba ïohi jngai, kiba saiñdur thymmai, bad kiba shlur, bad ba man la ka jingjop jong ki samla jong ka ri ka pynkhlaiñ ïa ka jingïaid jong ka ri sha ka Viksit Bharat.
Ha ka Youth Convention, u aktor Vikrant Massey u la ban jur ïa ka jingkiew kaba kongsan jong ka ïoh ka kot kaba wan na ki nongpynmih prokram jong ka India hapoh ka jingïalam jong u Myntri Rangbahduh ba donburom u Narendra Modi, da kaba ban jur ïa ki lad ki lynti kiba la wanrah lyngba ka jingpynkupbor ha ki kam digital bad ka jingsaiñdur thymmai.
U nongseng kam seng jam u Aman Gupta u la ïasam ïa ki jingmut halor ki sienjam jong ka Sorkar ban buh ïa ka India kum ka nongbah jong ki startup jong ka pyrthei da kaba kyntiew ïa ka jingseng kam seng jam, ka jingsain dur thymmai, bad ka jinglong jingman kaba biang ha ka kam khaïi pateng.
Ka jingïalang ka la rakhe ruh ïa ka jingtbit ha ka kam ïalehkai lyngba ka jingpynkup burom ïa ki nongïalehkai ba pawkhmat na ka bynta ki jingjop bad ki jingnoh synniang jong ki sha ki kam ïalehkai jong ka India.
Ïa ka jingïalang la plie paidbah da ka Pallavi Jain Govil, Secretary, Tnad Youth Affairs, kaba la ban jur ïa ka jingdonkam jong ka jingïashim bynta jong ki samla ha ka jingtei ïa ka ri bad ka jingkut jingmut ba ïai bteng jong ka Sorkar ban pynkupbor ïa ki samla nongïalam.
Ïa ka My Bharat Youth Convention la pynkut da ka Viksit Bharat Sankalp, kaba pynskhem biang ïa ka jingkut jingmut jong ki samla nongshong shnong ban noh synñiang shitrhem sha ka jingtei ïa ka Ri India kaba kiew, kaba lah ban kyrshan dalade bad kaba kynthup ïa baroh shuwa ka jingdap shispah snem ka jingïoh jinglaitluid ha u snem 2047.