Ïarap T.1 tyngka na ka bynta ka surok Langdongdai, kyrpad ka Synjuk Rangbah Shnong

Nongstoiñ, Jylliew 04: Ka surok na Langdongdai sha Mawkyllon kaba jngai tang kumba 6 km tam ei ei, ka dei ka surok kaba donkam eh ïa ki paidbah jong ki 15 tylli ki shnong bad ki palat ar hajar ngut tam ki briew ka thaiñ. Hynrei, ki sorkar naduh mynshuwa haduh ka MDA 1 bad MDA 2 ruh ka la leh meinah shaba palat, kaba la pynlong ïa ki paidbah ka thaiñ khamtam ki longkmie kiba armet ki hap ban kha, kiba pang ki hap ban dkut mynsiem tang ha shiteng lynti khlem poi sha CHC Riangdo namar ka jingsniew palat ka surok.
Kane ka jingsniew shaba palat kane ka surok la sakhi da kiba bun ki officer sorkar kiba heh bad kiba rit ruh kiba la wan ban pyndep kam sha ka thaiñ Langdongdai. Halor kane ka jingeh ki Rangbah Shnong ka thaiñ Nongtrai Sepngi, mynta u snem ki la lum ïa ka dorbar bad da ka jingïatylli ki la maramot da kaba ïa sei bor man kawei pa kawei ka longïing mar 100 tyngka, kali pick up mar 500 tyngka, ki kali sumo mar 300 kawei. Nangta wat ki kali maruti car ki sei mar 200 tyngka kawei bad la ai wai ban shna pynbha ha ka dor 140000 ei ei.
Kane ka jingpyrshang ka long tang ban ïarap ïa ki paidbah nongshong shnong ha kaba ïa dei bad ka leit ka wan, khamtam haba jia ki jingpang jingshitom bad ki kam kiba kyrkieh ha ka thaiñ.
U Bah Birbor Riangtem u ba long u nongïalam jong ka Synjuk ki Rangbah Shnong ha ka thaiñ, u la pynpaw ka jingdiaw mynsiem bad lyngngoh ba ka sorkar kmie ka la ithuh ïa ka shnong Langdongdai kum ka Asparitional Village napdeng ki shnong hapoh ri Khasi, hynrei ka sorkar MDA pat kam ithuh ïa kata.
Kumta, namar ka jingleh meinah ka sorkar MDA, ka synjuk ki Rangbah Shnong ki la buh ka jingkyrpad ïa ki paitbah ka jylla bad wat kiba nabar ruh lada don kiba sngewlem ïa ka jingeh kaba ka thaiñ ka mad, ki la buh ka jingkyrpad ban pdiang ïa ka jingïanoh synñiang lem ki para ri naduh ka 1/- shaneng bad ban phah jingïarap ha ka QR CODE.
U la ong ruh ba nangne shakhmat baroh ki officer sorkar, ki nongmihkhmat paitbah, ki paitbah kiba ïaid lynti na kane ka lynti ki dei ban siew bai ïaid ha la ki jong ki jong ki dor ba ka synjuk ka la buh.