Mynshwa 45 minit mynta pat tang 7 minit la poi ba ladep ka surok fourlane ha Upper Shillong, ong u Dy.CM

Shillong, Jymmang 30 : U Symbud Myntri Rangbah ka Jylla, Bah Prestone Tynsong ha ka sngi Thohdieng u la ong ba naduh ba la dep ka surok fourlane ha Upper Shillong ki paidbah ki shim por tang kumba 7 minit eiei ban poi shaduh Rilbong Point ban leit sha ïew lane sha ki thain Mawlai bad kiwei kiwei ki bynta jong ka sor Shillong.
Haba kren bad ki lad pathai khubor hadien ka jingwan jurip ïa ka thain Upper Shillong u Symbud Myntri Rangbah u la ong, “Naduh Jingkieng Umshyrpi haduh ba kut kane ka surok 4-lane, mynta ka shimpor tang 6-7 minit. Hashuwa ka 4-lane, na 7th Mile sha Jingkieng Umshyrpi ka ju shim por kumba 45 minit, teng teng haduh shi kynta.”
Katkum ka jingong jong u naduh ba dep kane ka surok ym judon shuh kiba khnium ïa ka leit ka wan khamtam naduh Upper Shillong shaduh Petrol Pump barim namarba kam ju don shuh ka dheng kali.
Watla katta pat u la ong ba ki dang don ki kam kiba dang sahteng ban pyndep pura da ka kompani. “Shen u Chief Engineer, National Highway, ha ryngkat ka kynhun jong u, ka Synjuk ki Rangbah Shnong, u BDO ka Mylliem bad ka kompani kin sa ïa pynlong ïa ka jingïajurip lang khnang ba ha kino kino ki jaka ba donkam ban pynbeit yn lah ban shim rai hangto hi,” u la ong.
Shwa kane, u Symbud Myntri Rangbah ha kane ka sngi u la wan ban jurip ïa ki jaka kiba ka sorkar ka thmu ban tei ïa ka Police Station kumjuh ïa ka Fire Service Station kaba don ha jingkieng Umshyrpi kaba rim bad bad kham haneng pat ki thmu ban shna ïa ka Tourist Information Centre bad kumjuh ïa ka ophis treikam jong ka Synjuk ki Nongsynshar Shnong ka Upper Shillong.
“Ka jingjurip mynta ka sngi ka long tang ban ithuh ïa ki jaka” ong u Bah Prestone haba bynrap “Ngin sab uh ïa ka Police Station ba pura bad ka Fire Station ba pura ha ka jaka ba lait marjan ka Jingkieng 4-lane ka Umshyrpi”.
Nangta u ong ruh ba hadien ka jingjurip un sa khot ïa ka jingïalang jong ka tnad ban pynïaid shakhmat ïa kine ki project bad ba kin sdang ban shim ïa ki sienjam kiba donkam.
Ha kane ka jingleit jurip la donlang naduh ki Nongïalam jong ka Synjuk ki Nongsynshar Shnong, nangta u MLA barim ka Mylliem Bah Hamlet Dohling, Bah Daniel Thangkhiew Adviser ka Synjuk, ki Ophisar na ki tnad bapher bapher ka sorkar jylla kumjuh ruh ki heh pulit bad kiwei kiwei.