Shillong, Jymmang 30 : Kum ka dak ban rakhe ïa ka lyngkhuh sngi ka jingwan iuhkjat jong u Thomas Jones kaba sha kane ka jylla, ha ka sngi Palei u Symbud Myntri Rangbah ka Jylla u bah Prestone Tynsong u la plie ïa ka kamra duwai (Prayer Hall) jong ka Presbyterian Church of India ha ka shnong Kutmadan Sohra kaba la tip kum ka Thomas Jones 1 Prayer House.
Ha kane ka sngi la ïadon lang ryngkat u MLA ka Sohra u Bah Gavin Mylliemngap, ki dkhot jong ka PCI, ki Nongsharai Balang bad kiwei kiwei kiba la shah khot sngewbha bad la pyniphuh pyniphieng ïa kane ka jingïalang da ki jingrwai na ki samla ka Balang.
Haba kren kum u Kongsan u Bah Prestone Tynsong u la ong, ba kane ka long ka sienjam kaba bha tam ïa kaba ka PCI ka la leh bad khamtam eh ban burom ïa ka sngi kaba u Thomas Jones u la wan sha ri Khasi ban wanrah ïa ka thoh ka pule ban seng ïa ka jingngeit ha kane ka thain.
U la ai ruh ïa ka jingkular ba ka sorkar jylla shimkhia ïa ka jingkyrpad jong ka PCI ban tei ïa ka Thomas Jones Complex bad u la pyntip ba u lah dep ban leit ïa kynduh ïa u Myntri Rangbah ka Jylla u Conrad Sangma ryngkat lang bad ki Pastor ban ïarap ban mang ïa ka pisa khnang ban pynurlong ïa katei ka jingthmu kaban long kum ka dak ban burom ïa Thomas Jones u riewkhraw ka thoh ka tar jong ka Jaidbynriew Khasi.
