HT Wells:-
Tang khyndiat kynta hadien ba u Chief Justice ka India u Surya Kant u la kynthoh pyrshah ha Supreme Court ha ka 15.05.2026 ba ki samla ba kyrduhkam ha ka ri Indïa ki long thik kum ki ñiangkalaw bad ki dohlab (cockroach & parasites) jong ka imlang sahlang ba krih nawei shawei, kiba phai khmat sha ki lad pathai khubor, social media, kiba wad jingtip RTI tang ban ïoh khyrwit kylla ïa ka Ïingshari jong ka Ri. U CJI u thew ruh sha kito ki samla kiba shu ïoh degree thok bad kumta ter ter.
U Abhijeet Dipke u samla ba dang 30 snem ka rta, na Pune, uba pule ïa ka Master degree on Public Relations ha Boston University, USA tang mar sien tip ïa kata ka jingkynthoh beiñ, u la thaw ïa ka party ba la tip kum ka Cockroach Janta Party (CJP), ym lyngba ki rynsan ïalap election lane lyngba ki tynghung pynsawa hynrei lyngba ka rynsan social medïa ka Internet, ban ther kylla ïa katei ka jingkren beiñ jong u Chief Justice ka India, bad kaba lyngngoh ka long, ba tang hapoh laisngi, ka jingkhihwin ki samla ba la nang la stad hynrei ki bym pat donkam donjam (educated unemployed youths) ban pynïasoh bad katei ka party, ka long kumba khyrwit ka ‘erlangthari ha kaba haduh 19.4 million ngut ki followers ha ka Instagram, ha ka X platform ne Twitter ka don 35 hajar ngut ki nongbud bad kumba 3.4 hajar pat ha ka facebook, kaba la pynking baïong bad tam kput ïa ka enrolment drive jong ka BJP ha kato ka por. Nalor nangta, ki don sa ki nongsaiñ hima kiba la ihbha kum ki jong u Shashi Tharoor, Mahua Moitra bad kiwei pat kiba sngewtynnad ïa ka party Ñiangkalaw.
Kumta, lah ban ong ba kane ka party thymmai ka dei ka platform jong ki samla ba tip kum kata, ka GenZ. Ka CJP ka la pyllait paidbah ruh ïa ka manifesto ba 5 point jong ka kumne : 01. Ym dei ban ailad ïa u Chief Justice of India ba la shongthait ban jied biang sha ka Rajya Sabha hadien ba u la shongthait, 02. Lada jia ba weng jubor ïa ka hok jong ki nongthep vote, dei ban set bad pynngat ïa u Chief Election Commissioner hapoh ka kyndon aiñ Unlawful Activities (Prevention) Act (UAPA) , namar ka jingweng jubor kam don jingïapher ei ei bad ka kam jong ki lehnoh, 03. Dei ban tyngkai haduh 50% ïa ka seat ki Kynthei ha Parliament bad 50% ban ai jaka ïa ki ha ka Cabinet , 04. Ban pyllait mraw ïa ki Lad pathai khubor, bad ïa ka Licence media jong ki Ambani bad Adani dei ban pynduh pyndam noh shisyndon, 05. Uno uno u MLA ne MP uba kyntiap na kawei ka seng sha kawei pat dei ban pynduh ïakhun election haduh 20 snem shisyndon. Bun ki samla ki ong ba ki kwah eh ban pynsawa ïa ka sur jong ki, tangba ka dei kat kum ka Riti synshar ka Ri India.
Kumba la seng tang marwei, kane ka party thymmai kam nym ïawer ïa kano kano ka seng saiñhima ba la don lypa, namar ba haduh mynta ym pat don uwei ruh u politician uba kut jingmut ban kyntiew ïa ka roi ka par jong ki samla.
Hynrei ha ka 21.05.2026 ka sorkar India lyngba ka Minstry of Electronics and Information Technology (MeitY) ka la hukum ban block noh shisyndon ïa ka Twitter Account jong katei ka party kat kum ka kyndon 69A jong ka Information Technology Act. Ki daw ba ai ki long : i) Ba ka ktah ïa ka jingshongshngain jong ka Ri, namar ki jingthoh ba pynklang ding ii). Na ka jingkiew kynsan jong ka jingpawnam hapdeng ki khun samla, sheptieng hana, ïoh don ka jingaimynsiem jong ki ri nongwei, lane ban ïakhih paidbah iii). Ka sorkar ka ima ïa ka jingktah jong ka jingïaleh pyrshah lehse ki ban ktah jur ïa ka sorkar kham hadien. Wat la ïa katei ka Twitter Account la blocked hynrei ka Instagram jong katei ka party kan ïaibteng ban treikam.
Hynrei, katei ka jingleh jong ka sorkar ka la aiding pynban ïa ki party Liangpyrshah, ha kaba u Shashi Tharoor, nongïalam ka Congress u ong, ba ka BJP ka la tieng palat ïa ka jingkiew ba kynsan jong katei ka party thymmai. U da ong ruh ba u sngewthuh bha ïa ka jinglynga jong ki samla ka ri namar ka jingkyrduh kam. Dei ban ailad ïa ki samla ba kin pynsngew ïa ka sur jong ki, ym ban set gag ïa ka shyntur jong ki. U Sanjay Raut nongïalam ka ka Shiv Sena (UBT) MP u kren pharshi da kaba ong, kane ka sorkar ka dei ka sorkar ba ïalehthma lehnoh da ka Operation Sindoor balei kan tieng tang ïa ki Ñiangkalaw ?.Katba u Deepak Ranjan nongaiktien ka Samata Party pat, u ong, ki khun ki dei ban ïohlad ban pynpaw lyngba ki social media haba kim ïohlad ban tur sha surok.
Haba phai pat sha ka jingpynksan ka BJP balei ba ka la set noh ïa katei ka Account, Nishikant Dubey BJP u ong, u nongseng ïa kane ka party thymmai hana, dei u nongtrei barim jong ka Aam Admi Party, ka don ka jingmaham ïa ki Opposition ruh, hato phi donkam ban wad jingïarap na ki ri nongwei ban pharia ïa ka India u la kylli, nangta sa u Tajinder Bagga BJP, u kynnoh ba u nongseng jong kane ka party dei uba la shah jer kyrteng ha ka jingpynphriang khubor hamsaïa ïa ka Kashmir ha ka snem 2019, nangta, u dei ruh u nongïalam ba hakhmat duh ban ïakhih CAA, ryngkat ka jingkyrshan barieh jong ka Khalid.
Ka jingkhynñiuh jong ka sorkar Indïa ka paw, wat la ka pyrshang ban buhrieh namar ka jingpawnam ba kynsan jong ka Cockroach Janta Party, namar ka lad syntiat jong ka, ki tip ba kane ka party ka lah wat ban pynkhyllem kdur ïa ka BJP na ka bor wat la ka Liang Opposition kam i don jingkyrmen ïa mynta. Ka jingshisha ka sah, ba ka bor ki samla ha kylleng ka pyrthei mynta ka paw, namar ki im lynga ha ka lawei badum, ka bym i don jingkyrmen. Dei namarkata ka daw, ki samla, ba ki khot kum ki patengthymmai (GenZ) jong ki ri ba marjan jongngi kum ka Nepal, Srilanka, Bangladesh bad wat ha ka jylla Tamilnadu dangshen, ki trei tyngeh ban wanrah thiaw ïa ka jingkylla. U Shashi Tharoor ha kawei ka liang u kynthoh, balei ka BJP kan tieng, ha ka jingshisha ka dei ban shim kabu ban pyndonkam ïa ki samla haba ki election ki pyllong man ka por na kawei ka jylla sha kawei pat.
Hynrei kawei kaba sngewlyngngoh ka long, ba u samla Abhijeet Dipke u ïathuh ba sdang ruh ym pat sdang treikam, u la ïoh ïa ka jingthoh byrngem pynïap ïa u, u ong ruh tip ïoh tang shu hiar na aeroplane ban land ha India, u la shah kem pynban, ym lah ban tip. Lada kumta, ka Indïa kam pat dei ka democracy kaba laitluid, kaba ki paidbah ki lah ban pynsawa ïa ka sur jong ki bad ban pynpaw ïa ka jingsngew jong ki sha ka pyrthei. To ngin ap shipor kaei ka jingkylla lyngba ka party Ñiangkalaw ne Cockroach Janta Party.