Bym teh kyndon ka sorkar haba ai skhim lyngba ka aqua mission sepei da ki phew klur tyngka

Nongstoiñ, Jymmang 24: Ka jingpyntrei kam jong ka sorkar ïa ka aqua mission na ka bynta ban kyntiew ïa ka kam ri dohkha ka la ïaid mynta la bun bun snem bad ka jingbei pisa sha na ka bynta ka tei ka mission ha man la ka san snem ka kot da ki phew klur tyngka.
Kaba lyngoh pat ka long ba naduh ba la pyntrei kam ïa katei ka mission haduh mynta ki paitbah nongshong shnong ha ka jylla naduh ki jaka sor haduh ki jaka ba kyndong tam ki dang bam da ki dohkha ba la wanrah naduh Andra Pradesh, Uttar Pradesh bad ki ktung mluh ba tyrkhong, bad kiwei kiwei ki jait ktung ba wanrah na shbar ka jylla.
Haba phai pat sha ka jingdon jong ki pung ri dohkha tang ha poh West Khasi hills bad Eastern West Khasi hills kiba ïoh jingïarap na ka sorkar lyngba ka aqua mission ba la pyntrei kam da ka Fisheries department ki la kot da ki pewhajar tylli hynreri ka jing pynmih dohkha ha ki ïew ki hat ym pat don satia wat tang shi kilo ruh haduh mynta.
Haba pyrshang ban buddien ïa ka jingbym lah ban pynmih dohkha jong kito kiba ïoh jingïarap na ka sorkar ban shan pung lyngba katei ka skhim la lap ba ka daw ba kongsan ka dei namar aba ka sorkar kam shym la buh kyndon stia ïa ki nongïoh skhim shuwa ba kan ai.
Dei halor katei ka nongrim ba ki nongshong shnong kiba ïoh jingïarap ki shna ïa ki pung ym ban pynmih dohkha ha ïew ha hat hynrei ban pynlong ïa ki pung jong ki kum ki jaka ban pynlong ïa ki jingïakop khwai na ka por sha ka por.
Ym lah ruh ban len ba ka jingpynlong ïa ki jingïakop khwai dohkha ka dei ka kam kaba ki paitbah wat la ki dei kiba duk ba kyrduh katno katno ruh kim salia ban wad da ka ram ka nong ban ioh leit sha ki jingïakop khwai namar ka buskit ka heh bha hynrei na ki shihajar ngut kiba leit sha ka jingïakop khwai tang arphew ngut ne tam kiba ïoh buskit katba ki khyndai hajar khyndai spah tam pat ki leit phai thylli.
Kumta lada ka sorkar ka dang pyntrei kam ïa katei ka aqua misson ka la dei ban buh da ki kyndon kiba pyrkhing ïa ki nongïoh jingïarap khnang ba ka pisa kaba mih na ka sorkar kan tyllun ha ki paitbah ka jylla. .