Ïateh MoU ka Sngap Syiem College, Mawkyrwat bad ka Assam Don Bosco University
Ban pynkiew ïa ka pule puthi ki samla
Mawkyrwat, Jymmang 24: Ka Sngap Syiem College, Mawkyrwat, ha ka 22 tarik u Jymmang 2026 ka la ïoh ban soi ïa ka Memorandum of Understanding (MoU) bad ka Assam Don Bosco University na ka bynta ban pynshlur ïa ki samla pule ban bteng ïa ki jingpule bapher bapher ha katei ka skul bah bad ha kiwei de ki jaka pule hadien ba ki la pyndep ïa ka jingpule jong ki na Sngap Syiem College, Mawkyrwat.
Kane ka jingïateh jingïasngewthuh jingmut kan ai mynsiem ruh ïa ki nonghikai ban ïatreilang ha kaba kyntiew ïa ka pule puthi bad ka wad bniah lyngba ki Publication, Research, Seminar, Workshop bad kiwei kiwei ki prokram kiba donkam eh ha kane ka juk stad mynta.
Haba ïoh ban ïa kren bad u Dr. K.K. Nongsiej uba dei u Principal jong ka Sngap Syiem College, Mawkyrwat lyngba ka phone ula ïathuh ba kum ka kolej ka la ïoh ruh ban soi Memorandum of Understanding (MoU) bad ka Sanapur College, Assam, kaba long kawei na ki kolej kiba paw hapoh Jylla Assam katkum ka jingïoh jingithuh NAAC Accreditation na Bangalore. Kane ka jingïateh ka long ban wanrah jingïatreilang hapdeng ki nonghikai ha ki bynta jong ka Joint Research and Publication, Seminar, Workshop, Faculty Development Programme bad Faculty Exchange Programme.
Nalorkata, u la ong ba kane ka MoU kan sa long ruh ka jingmyntoi kaba khraw ïa ki samla pule lyngba ki Student Exchange Programme, ban pyni ïa ka jingriewspah jong ka jaitbynriew Khasi lyngba ki Cultural Programme, Seminar, Workshop bad kiwei kiwei ki jingïalang pule kiba kyntiew ïa ka jingïadei bad jingïasngewthuh hapdeng ki jylla bapher bapher.
Ym tangkata, u Dr. Nongsiej u la ïathuh ba ha kine ki khyndiat sngi ban wan, un sa bteng ban pynbun ïa ki jingïateh kular (MoU) bad kiwei de ki Training Institutions, Educational Institutions, Professional Institutions, Industry-based Institutions bad Placement Agencies na ka bynta ban wanrah jingïohnong bad lad jingïarap ïa baroh ki samla pule jong ka dong ka thaiñ South West Khasi Hills District baroh kawei.