Angnud ka Hima Nongmynsaw ban thung Syiem pura noh ïa u Bah Phlowing Syiem

Nongstoiñ, Jymmang 24: Ka ophis jong u Syiem ka Hima Nongmynsaw Syiemship hapoh ka jingïalam u Pa’iem Phlowing Syiem Nongbah, ryngkat ka jingïasynranlang u bah Johnes Sohshang, bah Donbok Snaitang kiba dei ki Secretary ka Hima Nongmynsaw, ki la ïoh ban ai ïa ka jingthoh markhmat bad u Bah Winston Tony Lyngdoh CEM ka KHADC, halor ka phang ban dawa pynrung dkhot ba pura ïa ka Hima sha ka Regional Border Committee ka West Khasi Hills District Phase-II, kaba dei kawei na ka kynhun kaba ju shong ban ïa phylliew jingmut haba ïadei bad u pud u sam na ka bynta ban ïa pynbeit bad ka jylla Assam, namar kat haduh mynta ïa ka Hima la ñiew tang kum ka dkhot kaba shu pynïasoh ne ka Associated Member.
Ïa katei ka jingthoh la ïoh ban aiti ha ka 22 tarik u Jymmang 2026 ha ka jingïakynduh lang hapdeng ki MDC bad ki nongkitkam jong ka Hima, ïa kaba la pynlong ha ophis u Syiem ka Hima Nongmynsaw Syiemship ha ïew Langpih West Khasi Hills District.
La ong shuh shuh ba haba ïadei bad katei ka phang ka Hima ka la dep ban ai jingthoh ruh ha u snem 2023 sha ka Regional Border Committee lyngba ka Office jong u Deputy Commissioner West Khasi Hills. Hynrei ym shym la ñiewkor ïa ka jingthoh bad kat haduh mynta ka Hima kam pat shym la ïoh kano kano ka jubab.
Ym tang katta hynrei ka Hima ka la kam ruh ba ka don haduh 42 tylli ki shnong hapoh jong ka, ha kaba ka Hima ka la dep ruh ban dro ïa ka Map da kaba leh lyngba ka GPS bad ka la pynbiang lut ïa ki kot ki sla kiba don jingïadei bad u pud u sam. Kumta ka Hima ka la kyrpad ruh ïa ka Council ba kan ithuh ne mynjur ban pynskhem noh ïa ka Map kaba la kdew da ka Hima Nongmynsaw Syiemship.
Shuh shuh, ka Hima ka la kyrpad ruh ïa ka Council ba kan mynjur noh ruh ïa u Pa’iem Phlowing Syiem Nongbah kum u Syiem ba pura jong ka Hima Nongmynsaw Syiemship namar kat haduh mynta u dang dei tang u Syiem ba shipor ne u Acting Syiem.
Halor kane ka jingdawa jong ka Hima, na ka liang u CEM u la kular ban shimkhia bad ban bishar bin pa bin ha ryngkat ka Executive Committee baroh kawei ha District Council. Hadien kata kan sa shim ïa ka rai ba kongsan kumno bad ha kano ka rukom ban leh katkum ka lynti jong ka synshar paidbah.