Ka don ka jingïapher ha ka jingpule ban shu tip ïa ka jubab khlem da sngewthuh ïa kaei ka jingmut: Conrad

Tura, Jymmang 23: U Myntri Rangbah ka Jylla Conrad K Sangma ula shah pynkup burom ha ka All Garo Hills SSA School Teachers Association (AGHSSASTA-CB) ha ka sngi Saitjain kum ka jingithuh ïa ka jingpyrshang ka Sorkar jong u ban pynkhlain ïa ka kam puthi puthi bad shimkhia ban leh eiei ïa ki jingeh jong ki nonghikai SSA hapoh ka Jylla.
Ïa kane ka jingialang pynkup burom la pynlong ha madan ialehkai ka Matchakolgre LP School ha Tura bad la wan iashimbynta da ki nonghikai, ki Ophisar ka Tnad Pule Puthi, ki nongialam shnong bad ki riew paidbah na kylleng ka ri-lum Garo.
Ha kane ka jingialang, u Myntri Rangbah ula pynlait ïa ka MBoSE E-Office Management System bad Accounting System, ka digital dashboard kaba thmu ban pynjanai ïa ka rukom pyniaid ïaka pisa pilain, ka jingtreikam kaba shai bad ka jingkit khlieh hapoh ka kam pule puthi.
Ula pynlait ruh ïa ka Chief Minister’s Leadership in Education and Development (CM-LEAD) Fellowship, ka prokram ka Jylla kaba pynwandur ban wanrah ïa ki samla kiba tbit haka kam pule puthi ban kyrshan ïa ka jingwanrah ïa ki buit treikam thymmai, ka synshar khadar bad jingpyntreikam ïa ki prokram pule puthi ha baroh ki 12 tylli ki District ka Jylla.
Katkum ka jingong ki heh Sorkar, kane ka prokram ai jingiarap kan pynkhlain ïa ka jingmih na ki jingai jinghikai ha jan 8000 tylli ki skul Sorkar bad ki skul ba ai jingiarap ka Sorkar ha baroh kawei ka Jylla.
Ha kawei pat ka prokram ba kongsan, u Conrad ula pynlait ïa 27 tylli ki kali kiba thmu ban pynkhlain ïa ka jingpeitbniah ki Ophisar kiba don ha ki lyngkha treikam bad ka ïaid ka ïeng ha kylleng ki District.
Haba kren ha ka jingialang, u Myntri Rangbah ula ong ba ka pule dangle ka dang long kawei na ki mat treikam ba kongsan eh jong ka Sorkar bad ai jingithuh ïa ka bynta bala shim da ki Nonghikai bad ki Ophisar ha kane ka kam.
“Bun sien, ka jingtrei shitom ki Ophisar bad ki Nonghikai ka dei ka bym ioh jingithuh bad bym ioh jingiaroh wat hapdeng ka jingkitkhlieh kaba khraw kaba ki la kit” ula ong.
Haba kdew ïa ka jingaiti u (L) PA Sangma sha ka pule puthi, u Myntri Rangbah ula ong ba ki jingpynkylla ha ka kam pule puthi ka dei kaba la btin lynti da ki nongrim jong ka jongshakri bad ka jingpule kaba bha.
U Myntri Rangbah ula ainam ruh ïa ka jingpass bha jong ki Khynnah ïa ka eksam SSLC sha ki prokram bapher bapher bala wanrah da ka Sorkar, kynthup ka CM IMPACT Guidebook, bad ban jur ïa ka jingkongsan ban pule da ka jingsngewthuh ban ïa kaba shu bam lyndet.
“Ka don ka jingiapher bak ly bak hapdeng ka jingpule ban shu tip ïa ka jubab bad ka jingsngewthuh ïa kaei ka jingmut” ula ong haba kyntu ïa ki nonghikai ba kin pynleit jingmut ha kaban pynbha ïa ka jingmih na kaei kaba ki hikai hapdeng ki khynnah skul.
U Commissioner and Secretary ka Tnad Education Vijay Kumar Mantri ula kren halor ki jingpyrshang ba dang ïaid jong ka Sorkar ban pynjanai ïa ka synshar khadar, ka jingtreikam kaba shai bad ka jingpyndonkam ïa ki technology ha ka kam pule dangle.
Ha kajuh ka por, u President ka AGHSSASTA-CB Labingstone G Momin ula ai khublei ïa ka Sorkar halor ka jingpynbeit ïa ki jingeh kiba la slem bha jong ki nonghikai SSA bad ka jingkynshew ha ka kam pule dangle.