Tura, Jymmang 23 :U Myntri Rangbah ka Jylla Conrad K Sangma ha ka Sngi Thohdieng ula ïashim bynta ha ka “MLA Connect” ha ka shnong Matchikolgre, ha sor Tura kum shibynta jong ki jingpyrshang ba ïai bteng ban pynkhlaiñ ïa ka jingïakynduh bad jingïakren bad jingïadei markhmat bad u paidbah.
Ha kane ka jingïalang, u Myntri Rangbah ula ïoh ïakren ïa shibun kiei kiei bad ki nongshong shnong, ki nongïalam shnong, ka seng samla, bad ki kynhun bapher bapher na ka shnong.
Ki Nongshong shnong ki la pynsngew ïa bun ki jingsngewkhia haba ïadei bad ki surok, ki nala, ki jaka leit bar, ka bording elektrik, ka jingsam um bad ki jingtei ha jaka sor. Ki paidbah ki la pynpaw ba ki kali lum niut kim lah ban poi sha ki katto katne ki bynta jong ka shnong ha ka por lyiur namar ka jingbtuid bad sniew jong ka surok, kaba lam sha ka jingeh ha ka jingleit lum ïa ki niut ki nier.
Haba jubab, u Myntri Rangbah ula bthah ïa ka Tura Municpal Board (TMB) ba kin wad ïa ki lad ki lynti ba shipor ban pynthikna ïa ka jingleit lum niut ba khlem sangeh hapoh ka shnong. Ula pynpaw ruh ba ka Sorkar kan sa shong bishar ïa ka jinglah ban pyndonkam noh da ki kali 4X4 ban lum niut khnang ban lah pynpoi ïa ki kali sha ki jaka kiba long sharing bad ha ka por ba sniew ka suiñbneng.
Ha ka jingïakren, ki nongshong shnong bad ki nongïalam shnong kila pynpaw ïa ka jinglong jingman jong ki skul primary ki bym dei jong ka Sorkar, kiba don haka shnong bad pynsngew ïa ka jingsngewkhia haba ïadei bad ka jingduna ki jingtei kynthup ki kynroh, ka bording bad ka jingai um, bad ki paiñkhana. La kyrpad ruh ban pynïoh ïa ki jaka lehkai na ka bynta ki khynnah kiba don ïa ki swing, slide bad kiwei ki tiar ïalehkai. U Myntri Rangbah ula kular ba un sa khmih bniah ïa kine ki jingpynsngew na ka bynta ban ai ka jingkyrshan bad ban leh eiei.
Kawei ka seng ki samla ka la kyrpad ïa ka jingkyrshan na ka bynta ban shna ïa ka madan ïalehkai basketball bad kiwei ki jingtei ba ïadei bad ki samla. Haba jubab ïa kane, u Myntri Rangbah ula kular ban ai jingïarap ha ka dur jong ki tiar tem bad ki tiar ïalehkai na ka bynta ki Youth Club ban pynshlur ïa ki samla ba kin leh ïa ki kam kiba tei, ki kam ïalehkai bad ki kam ba ïadei bad ka kolshor.
Ki nongshong shnong ki la pynpaw ruh ïa ka jingsngewkhia halor ka jingheh ka bill bording hadien ka jingpyndait ïa ki smart meter. Ki Ophisar na ka MeECL ki la pynshai ba mynshuwa, kiba bun ki longïing kim don satia ïa ki smart meter lane ki meter ba ju pyndonkam mynshuwa, bad bunsien la shna ïa ki bill kat kum jingkheiñ ba shu antad. Da ka jingpyntreikam ïa ki smart meter, ïa ka bill la shna kat kum ka jingpyndonkam ïa ka bording.
La pyntip ba ka kynhun kan sa leit sha kane ka shnong ha ka sngi Nyngkong ban peit ïa kane ka kam. La kular ruh ïa ki nongshong nshnong ba lada ki jingeh ki dei kiba shisha lane lap ïa ki jingbakla ha ka jingshna bill, ka tnad kan sa shim mardor ïa ka lynti ban pynbeit.
Ha kane ka jingïalang, u Myntri Rangbah ula kren ruh ïa ka jingkongsan jong ka jinglum khana samari halor ka ïoh ka kot ba dang ïaid mynta bad kyntu ïa ki nongshong shnong ba kin ïashim bynta ha kane ka jinglum khanasamari. Ula pynpaw ba ka khanasamari ka long kaba kongsan bha ïa ki longïing kiba duna ka jingïoh bad ki BPL, namar ka jingkheiñ kaba beit ka long kaba kongsan na ka bynta ka jingshna ïa ki plan, ki skhim ka bha ka miat, bad ka jingpynpoi ïa ki jingmyntoi ba ai ka Sorkar sha kiba dei hok.
Haba ai jingkren, u Myntri Rangbah ula ïai ban ïa ka jngkut jingmut jong ka Sorkar ïa ka synshar khadar kaba buh hakhmat eh ïa u paidbah bad ka jingïashim bynta lang ha ka roi ka par.
