Plie u S.E.Tourism ïa ka First Eco-Sustainable Habitat Project ba nyngkong ha Mawlangwir

Mawkyrwat, Jymmang 20 : Ka jylla Meghalaya ka la kynjoh sha kawei ka mawmer kaba kongsan ha ka liang ka jingtei kaba neh slem bad ka jingkyntiew ïa ki kam pynroi ha ki shnong ki thaw, da kaba plie paidbah ïa ka projek ka eco-sustainable habitat ba nyngkong eh ha jylla, kaba la tip kum ka Pine Home Eco-Sustainable Model Project, kaba don ha shnong Mawlangwir, South West Khasi Hills District.
Ïa kane ka jingtei la mang pisa haduh T. 2 klur tyngka ei ei, katba ka jinglut baroh kawei ka projek ka long haduh T. 4 klur, kaba la bei tyngka da Meghalayan Age Limited bad ka Directorate of Tourism, Meghalaya.
Ka Pine Home Architectural Launch Programme ka la pyni paidbah ïa ka rukom tei ïing kaba thymmai bad kaba pynïahap ïa ka jingïada ïa ka mariang, ka jingburom ïa ka kolshor tynrai bad ka jingpyndonkam ïa ka sap bad ka jingstad jong ki nongshna ïing ha ki shnong. Kane ka projek ka long ka dak kaba pyni shai ba ka don ka jingïatreilang hapdeng ki riew shemphang na ki shnong bad ki architect na shabar ri kaba la lah ban wanrah ïa ki jingjop kiba khraw.
Ïa kane ka prokram la plie paidbah da u Bah Michael Mawroh uba dei u Superintending engineering ka Directorate jong ka Tourism, Shillong, Meghalaya kum u Kongsan.
Ka jingïalang ka la sdang da ka jingkren pdiang sngewbha jong ka Jana Bednarova, Project Manager and Coordinator of Picasso Pupils – An Art Society, kaba la batai shaphang ka jingthmu bad ki jingangnud jong kane ka projek.
Ha kane ka sngi, ki architect kiba dei ki resource person, kata u Marek Guga bad u Jozef Fugger na Slovakia, Europe, ki la ai jingbatai halor ka jingkongsan jong ka sustainable design bad ka jingïasoh hapdeng ki rukom tei tynrai bad ki teknoloji kiba ïadei bad ka jingïada ïa ka mariang.
La khmih lynti ba ka Pine Home Project kan long kum ka nuksa ïa ki projek sustainable habitat ki ban sa wan ha Meghalaya, da kaba kyntiew ïa ka jingtei kaba don jingkitkhlieh ïa ka mariang bad ha kajuh ka por jingïada ïa ka pateng kolshor ba riewspah jong ka jylla.