Da ka jinghikai misteri dieng ïoh ki 15 ngut ba sumar ha New Hope De-addiction Centre, awdiangdiang

Shillong, Jymmang 20 : Ki la don haduh 15 ngut ki samla bad ki rangbah kiba shah sumar ha New Hope De-addiction Centre (Male), Mawdiangdiang, ki la ïoh pdiang ïa ki syrnod ha kane ka sngi Balang hadien ba ki la pyndep ïa ka jingshah hikai kaba shi bnai kum ki misteri dieng lane ka Basic Wood Technician Furniture Course, kaba dei shi bynta jong ka rukom treikam jong ka Meghalaya’s Drug Reduction, Elimination and Action Mission (DREAM) ban kyrshan pat ïa kito kiba la ngop ha ki jingdih ba sniew ba kin lah ban ieng ha la ki jong ki kjat bad sdang ïa ka kamai kajih da katei ka jait kam baki la shah pyntbit.
“Ka thong hi ka long ban pynkupbor ïa ki ba kin lah pat ban kamai kajih ha ka imlang sahlang lyngba kane ka jinghikai ba ki la ïoh,” ong u Director ka DREAM, Bah Francis Kharshiing ha ka kyrwoh sha ki lad pathai khubor.
U la ïathuh ba kum ka jingkyrshan ïa kine kiba la dep shah hikai, ka Mission kan sa sam ruh da ki tiar trei sha baroh khnang ba kin lah ban sdang noh ïa ka kamai kajih jong ki.
“Kane ka sienjam ka long ba kin ym donkam shuh ban wad lad na ka bynta ban thied ïa ki tiar trei kumta kane ka long kum ka jingkyrshan ïa ki ba kin lah ban kyrshan bad ieng ha la ki jong ki kjat,” u la bynrap shuh shuh.
Ïa kane ka jinghikai pyntbit la pynlong da ka jingïatrei lang bad ka Meghalaya State Skills Development Society (MSSDS) hadien ba ki la dep ban soi ai ka Memorandum of Understanding ha u snem ba la dep.
La ïathuh ba da kane ka jingïatrei lang, ka MSSDS ka la pynlong bun ki prokram ai jingpyntbit ïa kito kiba don ha ki jaka sumar kyrpang kylleng ka jylla ba kin lah ban ieng ha la ki jong ki kjat.