Da ki hajar ngut ki pulit Assam kiba hiar sha ki jaka rep, ym pat ïoh leit rep ki nong Lapangap : HNYF

Jowai, Jymmang 18: Ka Hynñiewtrep National Youth Front (HNYF) West Jaiñtia Zone mynta ka lah sngi u Blei 18 tarik u Jymmang, ki la pyntip ba ki la hiar sha shnong Lapangap da ka jingthmu ban leit synran ïaki nongrep sha ki jaka rep jong ki kiba don haka shnong Lapangap, hynrei ynda la poi ha katei ka jaka la wan hiar syndon da ki hajar ngut ki pulit Assam kiba la khang ïa baroh arliang (Pnar-Karbi) ba kin nym leit tur sha ki jaka rep.
Halor kane ka seng kala pynrem jur ïaka sorkar halor ka jingsahteng jong ka jingïakren ïasuk hapdeng ka jylla Meghalaya bad ka Assam kaba khlem sei soh eiei haduh mynta.
La ong ruh ba ka sorkar Meghalaya kala kular ban buh nongpahara da ki kynhun SF-10 hynrei la sakhi mynta ka sngi ha katei ka jaka ïakhajia kila don tang kumba 10 eiei ki pulit katba ka Assam kila wan poi da ki hajar ngut ha ryngkat ki tiar ki tar. Kaba la khanglad syndon ïa ki nongrep ban ïoh leit rep sha ki pynthor.
Shuh shuh ka seng lyngba ka kyrwoh na u Vice President ka West Jaiñtia Zone samla C. R. Ryngki kala pynrem jur ïaka sorkar Meghalaya kaba la kut tang haki jingkular ïaki nongshong shnong ka Lapangap, hynrei ki kam pat kim urlong satia kumba la kular.
Da ha kine ki kyndiat sngi bala dep na ka liang ki pulit hapoh ka jingïalam u SP ka WJHD kala don ka jingïakren pynbeit bad ki pulit ka Assam ban ailad ïa ki nongrep ka Lapangap ban hiar rep sha ki pynthor hynrei haduh mynta kam pat urlong.