Shillong, Jymmang 19 : Ka kynhun ïalehkai jong ka Langsning FC ka la ïoh ban khur ïa ka jingjop kaba 10 sien lynter khlem rem shisien ruh ha ka lympung ïalehkai jong ka 5th Meghalaya State League, da kaba pynliem haduh 6-1 kol ïa ka Nangkiew Irat ha ka jingïakhun kaba long hynne ka sngi ha madan SSA Stadium.
Ha kawei pat ka jingïakhun ha ka Group B, ka Rymbai Shkenshynriah SC ka la ïoh ban pynliem noh haduh 4-2 kol ïa ka Maram FC. Ïa ki kol jong ka ha kane ka sngi la ïoh ban thep da u Hesmiki Rymbai (28′), Monush Lapang (31′), Skilful Tariang (61′) bad Niphonghi Sumer (78′). Katba ïa ki kol jong ka Maram FC la ïoh ban thep da u Santosh Teron (50′) bad u Jakchim K Marak (88′).
Kumba long haduh mynta ka Langsning ka dang ïoh ïa ka nam kum ka kynhun kaba bat 100 persen ïa ka nam jop.
Ha ka jingïakhun ha kane ka sngi ka kynhun ka la ïoh ban pynkhih jar lyngba ki kol na u Samuel Phawa (18′, 21′), Morningstar Khongkiang (58′) bad ru na u rangthep kol ba ïoh thep bun kol eh mynta ka samoi u Nelson Rymbai (69′, 73′, 87’P). Ïa ka shi kol jong ka Nangkiew Irat pat la ïoh ban thep da u Ronaldkydon L Nonglait (27′).
Ha ka miej khein point mynta ka Langsning ka don da ki 9 point ha ka Group B, katba ka Shkenshynriah ka don ha kyrdan ba ar da ki 6 point, ka Nangkiew Irat da ki lai point ha kyrdan ba lai bad ka Maram pat ka khlem pat ïoh kamai point.
Ka jingïakhun ha kane ka sngi Balang na ka Group A, kata ha ka kylla kaba ar jong ka Quarterfinal kan long hapdeng ka Mawlai SC pyrshah ïa ka Rangdajied United FC ha ka por 2:00 baje nohphaisngi.
Nangta ka Nongkseh SSCC kan ïakhun pyrshah ïa ka Shillong Lajong ha ka por 6:00 baje janmiet. Kine ki kynhun ki dang dep ban tynjuh bor dang ha kine ki khyndiat sngi ha ka kylla kaba nyngkong ha kaba ka Mawlai ka la pynliem ïa ka Rangdajied da 2-1 kol bad ka Nongkseh ka la pynliem ïa ka Lajong da 2-0 kol.
Kumta, la khmih lynti ba ki jingïakhun ha kane ka sngi Balang baroh ar tylli, kin dei ka jingïakhun kiban shongshit bha namar baroh arliang kin ïakhun tyngeh ban ïoh ïa u namtam ban ïoh jam pat sha ka kylla kaba bud.
