MSL 5: Pynjemkhnap ka Nangkiew Irat ïa ka Maram, saw kol thep u Neblejohn

Shillong, jymmang 17: U Neblejohn Lyngkhoi u la ïoh ban thep ïa ka hat-trick kaba nyngkong jong ka wat ïakhun Quarter final ha ka lympung 5th Meghalaya State League ha ka jingjop jong ka Nangkiew Irat SC da 7-1 kol pyrshah ïa ka Maram FC ha ka Group B ha SSA Stadium ha ka sngi Saitjaiñ.
Ha ka jingïalehkai kaba bud la sakhi ïa ka Langsning FC kaba la pynjlan ïa ka jingjop kaba paka sha ka khyndai sien lynter, ha kaba mynta ka kynti ka la pynliem noh ïa ka Rymbai Shkenshynriah SC da 3-0 kol. U Donlad Diengdoh (14’) bad u Kyrmenskhem Mukhim (40’) ki la thep mar mar shi kol ha ka kylla step bad u Nelson Rymbai (59’) u la pynbud ïa kaba lai ha ka kylla miet.
Haba phai sha ka jingïakhun kaba nyngkong, ka Nangkiew Irat ka la lamkhmat lyngba ka kol jong u Dibinroy Nongspung (15′) hynrei ka Maram ka la pynïakhaid shipor lyngba u Seiborlang Tado (21′).
Ka Nangkiew Irat ka la shah pynbor ban bujli rangïalehkai dang kloi hadien ka jingmynsaw u Banshanlang Dhar, hynrei u nongbujli jong u, u Sandy Kharkongor (27’) u la pyndonkam hok ïa ka kabu da kaba pynkhihjar da ka khlieh ban pyn lamkhmat biang ïa ka Nangkiew Irat.
Nangta u Neblejohn u la thep ïa ka kol kaba nyngkong eh jong u ha ka minit kaba 39 – da kaba pyndei tiak da ka khlieh ïa ka bol pashat ba la pynbiang da u Sandy. U la thep ïa ka kol kaba ar hadien ba ïohpdiang ïa ka bol na u Sangti Janai Shianglong ha ka minit kaba 57 bad u la pyndep ïa ka hat-trick jong u ha ka 66 minit lyngba ka penalty.
Wat hadien ba la skhem ban khur ïa ka jingjop hynrei ka Nangkiew Irat kam shym la sangeh satia ïa ka jingpyrshang, pynban ka la thep sa ar tylli ki kol lyngba u Ronaldkydon L Nonglait (83’) bad u Neblejohn (87’). Kane ka dei ka jingjop kaba nyngkong hadien ba ki la shah rem ha ka Shkenshynriah ha ka jingïalehkai kaba sdang jong ki. Katba ka Maram pat ka la shah rem ha baroh ar tylli ki jingïalehkai ba nyngkong – bad kane ka nam rem ka kham duna khyndiat ban ïa ka jingshah rem ha ka Langsning da 7-0 kol.
Ha kawei pat ka jingïakhun, u Donlad u la pynkhihjar na ka bol pashat jong u Kyrmenskhem ban buh hakhmat ïa ka Langsning shuwa ba un siew kylliang da kaba pynbiang ïa ka bol sha u Kymenskhem ban thep ïa ka kol kaba ar hashwa ban jam sha ka por shongthait. Hynrei ha ka jingpyrshang ban pashat ïa katei ka bol u Donlad u la mynsaw ïalade bad la hap ban bujli ïa u da u Nelson uba la pynkhih ïa ka kol kaba lai ha ka kylla miet.
Haba phai sha ka miej kheiñ poiñ, ka Langsning ka lamkhmat da 6 poiñ, bud sa ka Rymbai Shkenshynriah bad ka Nangkiew Irat kiba la khur mar 3 poiñ. Watla ka Nangkiew Irat ka don ïa ka jingïapher kol kaba kham bha (+5 la -1), hynrei ka R. Shkenshynriah ka don ïa ka rekod jingjop pyrshah ïa ka Nangkiew Irat (head-to-head), kaba pynlong ïa ka ban bat ïa ka kyrdan ba ar.
Ha kane ka sngi Nyngkong ki kynhun jong ka Group A kin wanphai biang sha ki jingïakhun, ha kaba ka Rangdajied United FC kan aireng pyrshah ïa ka Mawlai SC ha ka por 2 baje nohphai sngi, bad baroh arliang ki thrang ban ïoh mad ïa ka jingjop. Hadien kane yn bud sa ka jingïakhun kaba jur hapdeng ka Shillong Lajong FC, kaba lamkhmat ïa ka Group, pyrshah ïa ka Nongkseh SSCC kaba wan baar ha ka por 6 baje janmiet.