Shillong, Jymmang 15 : U President ka Congress ha Jylla bad MP barim ka Shillong u Ma Vincent H Pala, ha ka sngi Palei ula pyntip ba ka party ka la rai ïa ka kyrteng jong u kum u kyrtong ha ka elekshon shiteng samoi ban wan jong ka Shillong Lok Sabha, haba bynrap ba u dang ap mynta satang ïa ka jingpynbna na Delhi.
U Ma Pala uba long MP haduh lai samoi bad shah pynliem ha u (L) Dr Ricky AJ Syngkon jongka VPP, da 3.7 lak vote ha u snem 2024, ula kyrpad ïa ki nongthep vote ka ri-lum Khasi Jaintia ba kin kyrshan biang ïa u, haba kdew ïa ka jingtreikam jong u ba 15 snem ha Parliament bad ka jingwanrah ïa ki kam pynroi.
“Ka la long final. Ngi ap satang ïa ka jingpynbna na Delhi. Lada ki sngewbha ïa nga, kin sa pynbna paidbah. Lada kim sngewbha, kin sa pan ïa kiwei pat ki kyrteng. Hynrei kumba ka long, ka la dei kaba kut bad nga kyrpad ïa ki paidbah ba kin kyrshan beit ïa nga” ong u Bah Pala haba ïakren bad ki nongthoh khubor.
Ula ong ba ka Congress ka la rai pyrshah ban pynïeng kyrtong kiba shu tan nabar ha kane ka kynti. “La jan arsnem shiteng nga la don shabar jong ka bor, bad nga la lah ban pynleit jingmut ha ki kam shimet jong nga. Mynta ka kynti, ka party ka la rai ba ngim dei ban shu wanrah ïa ki briew ban pynïeng elekshon. Ym kum kiwei ki part kiba duna kyrtong napoh ïing bad khot ïa ki briew na shawei tang ban ïakhun elekshon. Ngin ym leh satia ïa kata” ula ong.
Haba kren halor ki kam ba ula leh ha Parliament, ula ong “Lada phi peit ïa ka jingtreikam jong nga ha Parliament, Ngam ju kren than shaphang ïalade, hynrei nga tharai ka por ka la poi ban ïathuh ïa ki paidbah. Ka la don ha ka rynsan paidbah. Ka jingleit parliament jong nga ka pyni ba nga la shimkhia hok shisha-92% haba ïanujor sha ka 60-67 jong kiwei”. Ula pyntip ba un sa thep ïa ki kam ba ula leh ha ki rynsan paidbah khnang ba kin ai jingkynthoh.
Ula bynrap “Haba phai sha ka jingïashim bynta jong nga hapoh ïing Dorbar, Nga la rah palat 260 tylli ki jingkylli, haba ïanujor ba tang 18 lane 19 da kiwei. Ngam ju pynmih khubor ha ki social media. Haba phai sha ka jingthaw Aiñ, Nga la wanrah ïa ka Bill ban ïada bad pynneh pynsah ïa ka Sixth Schedule. Nga la wanrah ruh ïa ka Bill halor ka kam tih dewiong, ka Bill ban pynrung ïa ka ktien Khasi bad Garo ha ka khyrnit ba phra, bad ka Bill ban ïada ïa ki nongbylla ïing. Nga la wanrah shibun ki Bill. Ym don mano mano ruh ba leh ïa kata. Watla katta ki briew ki ong ba u Pala u khlem leh eiei”.
Haba batai ïa ki jingïoh ïa ki jingtei ha ka por ka jinglong MP jong u, u Bah Pala ula ong “Ha ka por ba nga long MP, ngim pat don satia ïa ka Kad Liengsuiñ. Mynta, ngi don ïa ka kad liengsuiñ kaba itynnad bha. Pyrkhat phi, lada ngam shym don hangtei, ban leit nangne sha ri-lum Garo phin dang hap ban ïaid lyngba ka Assam. Hynrei mynta ka la don ka surok na Shillong sha Tura lyngba ka Nongstoin. Ka Nongstoin mynta kala ïasoh sha Rambrai, Wahkajia bad wat sha Wahblei. Ka West Khasi Hills ka la kham biang ha ba phai sha ki lad pynïasoh ban ïa kaba mynshuwa”.
Ula ong ruh “Ngi la ïoh ïa la ka jong ka passport office hangne mynta. La kyntiew kyrdan ïa ka NEIGRIHMS. Ha NEHU, ki don tang katto katne ki deprtment mynshuwa hynrei hadien ba nga long MP, ngi la pynbun ïa ka jingdon ki Department. Nalor kine, nga la pynleit jingmut ruh ha ka ïoh kam ïoh jam”.
U Bah Pala ula pynkut “Nga kyrmen ba ki paidbah kin wanphai biang sha ka Congress bad ngin ïai bteng ban leh ïa ki kam kiba ngi la leh hashuwa”.
