Plie u MLA ka Mawsynram ïa ka ïingskul bathymmai jong ka Tyngnger Presbyterian L.P. School

Tyngnger, Jymmang 15: Ka Balang Presbyterian Tyngnger kaba hap hapoh ka Shella Presbytery mynta ka sngi ka 15 tarik u Jymmang 2026, ka la ïoh ban plie paidbah ïa ka ïing skul bathymmai jong ka Tyngnger Presbyterian Lower Primary School, kaba la seng naduh u snem 1900.
Ïa kane ka projek la tei ha ka mang tyngka kaba kot sha ka T. 54 lak lyngba ka Special Purpose Vehicle Society (SPVS), Shillong, ha kaba u MLA jong ka Mawsynram Constituency, u bah Ollan Sing Suin, u la long kum u Kongsan bad u la plie paidbah ïa ka ïing skul bathymmai.
Haba kren ha ka jingïalang kum u kongsan, u bah Ollan Sing Suin, MLA jong ka Mawsynram Constituency ula pynpaw ka jingïaroh na ka bynta ka Special Purpose Vehicle Society (SPVS), Shillong kaba la ka kti ka mon ka kti ka diang ban pyntreikam ïa ki kam pynroi ha kine ki thaiñ ym tang lyngba ki ïing shnong hynrei khamtam eh ha kaba ïa dei bad ka jingïaid shaphrang jong ka pule puthi jong ki khun khynnah bad ki khun samla.
Ym tangkata, ula ai ruh ka jingïaroh ïa ka Shella Presbytery kaba don ha ka ïa ka jingïohi jngai ban pyntyllun ïa ki kam ym tang ha ka jingshakri ïa U Blei ha ka ban pynsan ha ka jingim ba kynja mynsiem hynrei wat ha ka ban ai ruh ka jingnang jingstad ïa ki para mynsiem ha ka jingstad ba kynja doh ruh lyngba ki skul kiba long shibynta ka kam mission.
Ha kajuh ka por, u la kyntu bad ai mynsiem ruh na ka bynta ki khynnah skul kiba long ka lawei jong ka dong ka thaiñ ba kin ïai long kiba trei shitom ha ki por baroh khnang ba kin nang lah ban wanrah ka nam ka burom ha ki sngi bad ki por ki ban sa wan.
Kum ka dak jong ka jingkmen bad ka jingplie paidbah ïa kane ka ïing skul, la pynlong ruh ka jingot cake bad ki khynnah skul ki la pynsngewtynnad ïa ka jingïalang da ki jingrwai bad jingshad kiba iphuh iphieng.
Kiwei pat kiba la ai jingkren ha kane ka sngi ki kynthup ïa u Bah K. Suting, Project Manager jong ka SPV Society, Shillong kum u Symbud Kongsan; u Tbn. B.L. Jeengaph, Chairman jong ka Balang Presbyterian Tyngnger; bad u Tbn. N.D. Ïawphñiaw, Chairman jong ka Education Committee, Shella Presbytery.
Ïa ka jingïalang la pynïaid da u Rev. S. Syiemsad, katba ïa ka jingkren ai khublei la ïoh na u Babu M. Niangmih, Secretary jong ka Managing Committee ka Tyngnger Presbyterian L.P. School.
La sakhi lang ïa kane ka jingïalang da ki Pastor, ki Tymmen Basan, ki kmie ki kpa, bad ki khynnah skul kiba la wan ban ïashim bynta ha kane ka sngi kaba kyrpang.