SHILLONG, Jymmang 13: Ka Shillong Lajong FC kan ïakhun ïa ka jingïalehkai kaba khatduh ha la ïing ha kane ka samoi ïalehkai jong ka Indian Football League 2025-26 pyrshah ïa ka Rajasthan United FC lashai ka sngi Thohdieng, 15 tarik Jymmang ha madan First Ground-SSA Stadium, Polo. Kane ka jingïalehkai kan sdang ha ka por 6:30 baje janmiet.
ïa ki tiket na ka bynta kane ka jingïakhun lah ban ïoh na The Electronic Centre (Police Bazaar), Cafe Shillong (Laitumkhrah) & SSA Stadium Ticket Counter (Polo Ground).
Kumba ka long, ka Lajong ka don mynta ha ka kyrdan ba ar ha ka miej da 22 point naki 12 tylli ki jingïalehkai, bad ka duna 6 point hadien ka Diamond Harbour (28 point) kaba don jingkyrmen ban rah ïa ka nam lahduh mynta ka samoi. Watla katta ruh, ka Lajong kan donkam ban jop pyrshah ïa ka Rajasthan United FC ha ka sngi Thohdieng ban pynneh pynsah khyndiat ïa ka jingpyrshang jong ka kynhun ban knieh ïa ka kyrdan ba nyngkong na ka Diamond Harbour.
Ka Diamond Harbour ka don ïa ka lad ban pynskhem ïa ka nam lahduh lada ka jop ïa ka jingïakhun pyrshah ïa ka Dempo SC ka ban long ha ka 17 tarik Jymmang.
