Shillong, Jymmang 13: Ka Mawlai SC, kaba bat ïa ka nam lahduh, ka la pynkhihjar ha ka khyllipmat ba khatduh ban ïakhaid mar 1-1 bad ïasam point bad ka Nongkseh SSCC ha ka jingïalehkai Super 8 stage kaba nyngkong jong ka 5th Meghalaya State League.
Kumjuh ha ka Group A, ka jingïalehkai ha ka por janmiet ka la sakhi ïa ar tylli ki lahduh barim kiba ïa aireng pyrshah, ha kaba ka Shillong Lajong FC ka la lah ba kan pynliem noh da tang 1-0 kol ïa ka Rangdajied United FC. ïa kane ka namtam la thep da u Banlamkupar Rynjah ha ka minit kaba 73′.
Kham hashwa, u Hardy Cliff Nongbri u la pynkhihjar ha ka minit kaba 39 ban buh hakhmat ïa ka Nongkseh hynrei u Verjelous Shylla (90’+3) u la ïohlad ban pynïakhaid ha ki minit pynjlan ba khatduh jong ka kylla miet ban pynïoh ïa ka point na ka bynta ka Mawlai SC.
Baroh arliang mamla ki la ïoh ka jingkyrshan kaba paka naki paidbah kiba la pyndap ïa ki jaka shong hapoh ka SSA Stadium. Ka Mawlai ka la lah ban ïalehkai stet kumba long lem ki nongïalehkai jong ka Nongkseh hynrei kam shym la lah satia ban shem ïa ka kol khlem u rangïalehkai ba shakhmat uba thikna.
La pynjlan 6 minit ïa ka por shuwa ban kut ha ka kylla miet bad ka Nongkseh ka la shah khanglad ban khur pura ïa ki lai point hadien ba u Verjelous u la ïohlad ban bat kham slem ïa ka bol shuwa ba un shim ïa ka rai ban pyrshang hi dalade sha kol bad ka bol ka la ïaid lait na ki kti u nongapkol ka Nongkseh, u Guidle Syiemlieh. Ka dei ka kol ba nyngkong eh jong u Verjelous ha kane ka lympung bad ka lad kaba kyrpang ban pynpaw ïalade ha ki lympung bah namar ba u la ju ïalehkai mynshwa na ka bynta ki kynhun ba kham shapoh.
Ha kawei pat ka jingïakhun, ka Lajong ka la ïoh ïa ka kabu kaba paka ban pynkhihjar ha ka kylla step lyngba ka corner kick jong u Deibormame Tongper hynrei u nongïalehkai ba shadien ka RUFC u la lah ban khanglad ïa ka bol shuwa ba kan jam tam ïa u laiñ. Kum ban shu kdew, na ka liang jong ka RUFC, kam shym la paw kum ka kynhun kaba mad jingeh ban poi sha ka thup kyrdan Top 8 hynrei ka Lajong ka la khlaiñ bha ha ka liang ki nongïalehkai ba shadien kiba la khanglad ïa ka ban ïoh thep kol.
Ka Rangdajied ka la ïoh ïa ka kabu kaba bha tam ban thep kol ha ka kylla miet da kaba pyrshang lai ne saw sien hynrei ka jingskhem ki nongïalehkai ba shadien jong ka Lajong ka la pynlah ïa ka kynhun ba kan khanglad ïa ka liang pyrshah.
Ha kaba khatduh ka SLFC ka la ïoh ban pynïakhlad ïa ka jingïakhaid lyngba ka kol jong u Banlamkupar kaba ka jingpyrshang jong u ka la tyngkhuh shuwa ïa u rangïalehkai ba shadien, kaba la pynlong ïa u nongapkol ka Rangdajied u Meshan Banjop Sumer ban bakla khih ka met.
Ki jingïakhun Super 8 jong ka Group B kin sdang ha kane ka sngi Palei, ha kaba ka Nangkiew Irat SC kan ïakhun pyrshah ïa ka Rymbai Shkenshynriah SC ha ka por 11 baje mynstep bad bud sa ka jingïakhun hapdeng ka Langsning FC pyrshah ïa ka Maram FC ha ka por 3 baje nohphai sngi. Baroh ar tylli ki jingïalehkai kin long ha madan MFA.
