Shillong, Jymmang 13: Ka Meghalaya State Olympic Association kan sa pynlong biang ïa ka jingïakop mareh Shillong 10K Run ha ka 27 tarik u Jylliew kum shi bynta ban ïasnohkti lang bad ka pyrthei ban rakhe ïa ka Olympic Day 2026.
Kane ka jingïakop mareh kan long na ka bynta baroh ki kynthei bad shynrang kiba la palat 17 snem.
Ka lynti mareh na ka bynta kane ka sienjam kaba hynñiew jong ka Shillong 10K Run kan long kumjuh kumba long ha u snem ba ladep, kata ban sdang na khyrdop jong ka JN Stadium sha Polo, 4th Furlong, BK Bajoria, BK Bajoria School, PGT College, Shillong Commerce College, Shillong College, Don Bosco Square, Laitumkhrah Police Point, Laitumkhrah Police Beat House, Fire Brigade, St Edmund’s School, Dhankheti, Malki Point, Barik Point, Civil Hospital, State Central Library, Meghalaya Secretariat, Deputy Commissioner’s Office, Governor’s House, Ward’s Lake, Hotel Polo Towers, Polo Bazar bad wanphai biang sha khyrdop ba nyngkong jong ka JN Stadium.
Ka khusnam pisa ka sah kumjuh, ha kaba kiba wan ba nyngkong kin ïoh khur 5,000 tyngka, nangta ba pyndep kyrdan ba ar yn ai 3,000 tyngka bad kiba wan ba lai kin ïoh 2,000 tyngka. Ka MSOA ka la pynkhreh ruh san tylli ki khusnam kyrpang bad ki jingai sngewbha na ka bynta ki nongmareh kiba la palat ïa ka 55 snem kiba pyndep ïa ka jingmareh.
Yn sam ruh ïa ki t-shirt khlem jingsiew ha ka sngi mareh ha kaba kiba wan nyngkong kin ïoh nyngkong. Ka jingpynrung kyrteng kan long khlem jingsiew bad yn pdiang ïa ka jingpynrung kyrteng ha ophis treikam jong ka MSOA kaba don markhap bad ka JN Stadium naduh ka por 2 baje mynsngi haduh 5 baje janmiet ha ki sngi long trei. Ka tarik ba khatduh ban pynrung kyrteng kan long ha ka 19 tarik Jylliew.
