U-20 Men’s National Football C’ship 2026: Pynliem ka Meghalaya ïa ka Jharkhand; thep hat trik u Mebanlamlynti

Shillong, Jymmang 11: Ka Meghalaya ka la pynskhem ïa ka jingkhlaiñ jong ka ha ka Group A ha ka lympung U-20 Men’s National Football Championship 2026 da kaba pynjemkhnap ïa ka Jharkhand da 5-0 ha ka jingïakhun kaba la long hynne ka sngi Nyngkong ha Narainpur, Chhattisgarh.
ïa kane ka jingïalehkai la pynkynriah na ka por mynstep sha ka por janmiet hynrei kane kam shym la don jingktah satia ïa ka Meghalaya kaba la lamkhmat lypa ïa ka kylla step da 2 kol.
U Mebanlamlynti Masharing u la pynkhihjar nyngkong ha ka minit kaba 19 shuwa ba un thep sa ar tylli ki kol ha ka kylla miet (73’, 87’) ban pyndep ïa ka hat-trick. Kiwei pat ki nongthep kol na ka bynta ka Meghalaya ki long u Menangpyndap Khongjee (27’) bad u Damitre Kynjing (67’).
Kane kadei ka namjop kaba ar jong ka kynhun ha ka group hadien ba ka la pynliem ïa ka Bihar da 3-1 lai sngi mynshwa.
Ka jingïakhun ka ban wan jong ka Meghalaya kan long pyrshah ïa ka Andhra Pradesh lashai ka sngi Balang ha ka por 4:15 baje janmiet.