Shillong, Jymmang 10: Ka Meghalaya ka la sdang ïa ka jingïalehkai jong ka ha ka lympung Swami Vivekananda U-20 Men’s National Football Championship 2026 da ka jingjop hadien ba ka la pynliem noh ïa ka Bihar da 3-1 kol ha ka sngi Saitjaiñ ha Narainpur, Chhattisgarh.
U Samborlang Langte (20’) u la buh hakhmat ïa ka Meghalaya da ka kol kaba itynnad bha kaba u la pyrshang kham na jngai ha kane ka jingïakhun jong ka Group A, bad hashwa ba ka Bihar kan khie im biang ha ka jingïalehkai, u Menangpyndap Khongjee (26’) u la pynjlan ar shah ïa ka kol lamkhmat hadien katto katne minit na ka bynta ka Meghalaya.
Hynrei ka Bihar kam shym la kynrandien satia, bad ka la ïoh pynphai kawei ka kol ha ka bynta ba sdang jong ka kylla miet lyngba u Md Sadique Rahman (48’).
Watla ka la don hapdeng ka jingma, hynrei ka Meghalaya ka la bat skhem ïa ka kol lamkhmat kaba duna shuwa ba u Menangpyndap (90’+6) un pynthikna ïa ka jingjop khlem jingartatien da kaba pynkhih ïa ka kol kaba ar bad kaba lai na ka bynta ka kynhun ha ki minit pynjlan ba khatduh shuwa ban kut ka jingïalehkai.
Ka Meghalaya kan pynkhreh mynta ban aireng ïa ka Jharkhand ha kane ka step sngi Nyngkong, bad ka jingïalehkai kan sdang ha ka por 7:30 baje mynstep.
