Shillong, Jymmang 10: Ka jingïalehkai kaba khatduh na ki 104 tylli ki jingïalehkai group stage jong ka 5th Meghalaya State League la pyndep ha ka sngi Saitjaiñ, ha kaba ka Balmanduri FC ka la pynkut noh ïa ka jingïalehkai jong ka ha kane ka lympung da kaba jop da 1-0 ïa ka Janepih YSCA ha ka Group G ha Williamnagar.
U Jurisbirth Marak u la thep ïa kane ka shi kol ha ka minit kaba 24. Hynrei kane kam shym la don jingktah eiei ïa ka Janepih kaba la dep ban pynthikna ïa ka kyrdan ba nyngkong ha ka group shuwa kane ka jingïalehkai bad ka la pynshong jahthait ïa ki katto katne ki nongïalehkai ba kongsan. Na ka bynta ka Balmanduri, watla ka la jop hynrei kam shym la lah ban kyntiew kyrdan ïalade bad kan ïaineh ha ka kyrdan ba saw.
Mynta barih kin phaikhmat sha ka Pre-Quarterfinal ha kaba ki 16 tylli ki kynhun kiba kynsai tam na ki 33 tylli kiba la sdang ïa ka MSL 5 kin ïa aireng ha ka rukom ïakhun kaba tang shi wat ne knock out. Nangta ki kynhun ba jop kin jam sha ka wat ïakhun Round of 8, ha kaba kin don ar tylli ki group jong ki saw tylli ki kynhun ki ban ïakhun ïa ka round robin stage.
Kane ka sienjam ba 5 jong ka MSL ka kham heh ban ïa kiwei pat ki sienjam ba ladep. Shibynta kane ka long ban ai ïa ki nongïalehkai ïa ka por ïalehkai kaba kham bun kum shi bynta jong ka jingpyrshang kaba jylliew ban wanrah ïa ka kyrdan phutbol kaba kham bha. Ka pynbun ruh ïa ki jingïalehkai na ka bynta kawei pa kawei ka kynhun ban pynbiang ïa ki jingdonkam jong ka All India Football Federation (AIFF). Ha kane ka bynta, ka Meghalaya Football Association, da ka jingkyrshan ba pura jong ka Directorate of Sports and Youth Affairs, ka la nang pynjanai shuh shuh ïa ka rukom pynïaid ïa ka league, ha kaba la pyntreikam ïa ka AIFF’s Competition Management System bad ka Centralized Registration System.
Baroh ki jingïalehkai Round-16 kin long ha kane ka sngi Nyngkong (11 tarik Jymmang). Ha ki hynriew tylli na ki hynñiew tylli ki jaka ba pynlong ïa ki jingïalehkai kin sdang ha ka por 2 baje nohphai sngi. Hynrei ha madan First Ground-SSA Stadium ka ban pynlong ïa ar tylli ki jinïakhun, ki jingïalehkai kin long ha ka por 1 baje mynsngi bad ha ka por 5:30 baje janmiet.
Ka prokram ïalehkai Round-16 ha kane ka sngi Nyngkong:
Shillong (SSA Stadium) – Nangkiew Irat SC pyrshah ïa ka Khimusniang SC, 1 baje mynsngi
Shillong (SSA Stadium) – Nongkseh SSCC pyrshah ïa ka Mawphu SC, 5:30 baje janmiet
Amlarem (Ladjaplem) – Mawlai SC pyrshah ïa ka Thangskai Tiger SC, 2 baje nohhai sngi
Wahiajer (Wahiajer Sports Complex) – Shillong Lajong FC pyrshah ïa ka Mishon SSCC, 2 baje nohhai sngi
Williamnagar (WDSA Ground) – Janepih YSCA vs Rangdajied United FC, 2 baje nohhai sngi
Khliehriat (Deinchynrum) – Rymbai Shkenshynriah SC pyrshah ïa ka Amlarem SC, 2 baje nohhai sngi
Mairang (Dommawlum) – Langsning FC pyrshah ïa ka Lumphyrnai Sohphoh FC, 2 baje nohhai sngi
Mawkyrwat (MDSA Ground) – Seng Samla Umdang Pyllun pyrshah ïa ka Maram FC, 2 baje nohhai sngi