Halor ki kam pynroi ha Ri-Bhoi tur kiba naei, khlem tip ka duh ka dang, ka dei ka jingïakhih politik: Prestone Tynsong

Nongpoh, Jymmang 06: U Symbud myntri Rangbah ka jylla u Bah Prestone Tynsong mynta ka sngi u la ther tyngeh ïaki briew kiba leh politik ha kaba ïadei bad ka jingthmu jong ka sorkar ban wanrah ïaki kam pynroi ha Ri-Bhoi District.
U Bah Prestone um shym la kren beit ïaka mat hynrei ka jingkren jong u la sngewthuh shai ba u la thew beit ïaka Taj Resort and Spa ba ka sorkar kala thmu ban wanrah ha Umiam, bad ai jingïaroh shi katdei ïaki nongïalam shnong ba ka Ri-Bhoi ka dei ban long ka nuksa ïa kiwei pat ki district haka jylla.
“Teng teng ki nongïalam shnong ki don shadien, hynrei tur kiba naei, ïaid kiba naei khlem tip ïaka dang ka duh, khlem tip ïaka iap ka im, khlem tip ïaka jingdonkam, u paidbah u shah ïalam bakla, namar kam don kano kano ka ban ïakhih hynrei kala dei tang ka jingïakhih ban leh politik yn naka bynta ka roi ka par” la ong u Bah Prestone.
Naka liang u Bah Prestone u la ai ka jingïaroh ïaka Synjuk ki Rangbah Shnong kaba la mih shakhmat bad u la pynpaw ruh ba u sngewtynnad ban ïatreilang bad kane kynhun kaba kyrshan ïaki kam pynroi ha kane ka district naka bynta ka jingmyntoi u ba bun ba lang.