Ngi pyrshah ïa ka Earth Tree Project : Wat ktah ïa ki jaka rep : wad da ki jaka ba long syllen : RAFA

Mawkyrwat, Jymmang 06 : Ki nongrep kiba dei ki khun ki hajar jong ka Hima Maharam Syiemship kiba hap hapoh ka shatri jong ka Ranikor Area Farmers Association (RAFA), mynta ka sngi ka 6 tarik u Jymmang, 2026 ki la leit ban kynduh ïa u Pa’iem Niandro Syiemiong uba dei u Syiem ka Hima Maharam Syiemship ryngkat bad ka jingthoh, ban pynsngew ha u ïa ka jingpyrshah bad ka jingbym sngewïahap jingmut halor ka jingthmu ban ïaid shakhmat jong ka Earth Tree Project ha ka thaiñ (Raid) Ranikor–Balat, South West Khasi Hills District.
Ïa ka kynhun ban leit ïa kynduh la lam khmat da u bah Michael Lyngdoh uba dei u President, Ranikor Area Farmers Association ha ryngkat ka jingsynranlang ki dkhot ka RAFA lem bad ki nongrep ka thaiñ Ranikor.
Lah ban kdew ba ka RAFA ka la shim ïa kane ka rai ban pyrshah ha ka jingïalang paidbah kaba la long ha ka 20 tarik u Ïaïong, 2026 namar ka ong ba ki lada kan pyntyllun ïa kane ka kam, ki nongrep ha katei ka thaiñ ki dei kiba im ja kpoh na ka kam rep kam riang, bad lada kano kano ka jingaiti ïa ki jaka sha ki projek kan ktah jur ïa ka jingim bad ka jingïoh jingïarap jong ki.
Ka RAFA ka pynpaw ruh ïa ka jingpyrshah jur halor kane ka Project namar ba ka dang long kaba kyllaiñ bad ym shai ki jingbatai. Namarkata, kum ki nongrep, kim sngewthuh shai ïa ki bynta jong kane ka Project bad ki sheptieng ba lada ka Hima ka bteng ban ai ïa kane, ïoh lehse kan wanrah ka jingïuhroit ïa ki hok jong ki kum ki khun ki hajar, khlem da don ka jingïasyllok paidbah ne jingïamynjur lang.
Shuh shuh, ka seng ka kdew ba ka jingïateh soskular (agreement) halor kane ka Project ka la jlan palat, ha kaba wat ki khun ki hajar ki hap ban shim wai ïa ki jaka jong ki hi tang lai snem bad ha ka dor kaba duna. Ka RAFA ka ong ba kane ka rukom ka lah ban pynlong ïa ki nongrep ban duh kam duh jam bad kumba knieh noh ïa ka pliang ja jong ki.
Ka seng ka pynpaw ruh ïa ka jingsngewkhia halor ka lawei jong ka pateng ban wan, da kaba ong ba ka kam rep ka dei ka tynrai jong ka jingïoh kam jingïam bad ka bam man ka sngi. Lada aiti ïa ki jaka sha ki Project, kan wanrah ka jingeh ïa ki khun ki ksiew ha ka lawei namar ka jingbym don shuh ki lad jingïoh kam.
Nalor kata, ka RAFA ka lap ruh ba ki jingmyntoi na kane ka Project kim long kiba wan beit sha ki account jong ki nongrep. Kumta, ki sngew ba ki jingïoh jingïarap kin ym lah ban ia ryngkat dor bad kaei kaba ki ju ioh na ka kam rep ha katei ka thain.
Kumta halor kine ki nongrim, ka Ranikor Area Farmers Association ka kyntu jur ïa u Syiem bad ka Dorbar Hima ba kin sngewbha ban pynsangeh shwa ïa kane ka Project namar ka jingktah kaba khraw ïa ki khun ki hajar bad ki nongrep jong ka Hima Maharam bad ym tangkata ki la ai jingmut ruh ba la u Syiem u thmu ïa kata ka projek thung dieng u la dei ban peit ha ki jaka ba long syllen khnang ba kan long ka jingmyntoi.