Shi khung ki mat dawa aiti ka SRS, Ri-Bhoi ha u CM haka jingïalang bah ki Rangbah Shnong

Nongpoh, Jymmang 06: Ka Synjuk ki Rangbah Shnong, Ri-Bhoi District mynta ka sngi kala aiti shikhung ki mat dawa hakhmat u Myntri Rangbah haka jingïalang bah jong ki Rangbah Shnong ka them Ri-Bhoi kaba la long mynta ka sngi ha Parish Hall Nongpoh.
Katei ka jingïalang ki Rangbah Shnong ka long ban ïathir ïa tai halor shibun ki jingeh bad ki jingdonkam ba hakhmat ba ka Ri-Bhoi District ka donkam ha kaba naka liang ki Rangbah Shnong kila ioh ruh ban ïakren markhmat bad u Conrad Sangma ban pynsngew ïaki jingeh haka Mini CM Connect ha kaba naka liang u Myntri Rangbah u la jubab mar mar ïaki jingkylli jong ki Rangbah Shnong kum ka jingdawa ban don noh ka kolej sorkar ha Nongpoh, ban pynbiang ïaka thud palat ka bording elektrik haka them Ri-Bhoi ha kaba mynta ka ka jingshna ïaka 132 KV substation ka dang ïaid bad kular ruh ban pynbun shuh shuh ki substation bad ki nongtrei, ka jingdawa ban don ka iew ki nongrep bad kumjuh ruh ki nongri sniang ba kim ym shah khniot than namar ka jingwan ki sñiang ba nabar, u pud u sam bad shibun kiwei kiwei.
Halor ka jingdawa jong ka Synjuk ban don noh kawei ka ophis treikam kaba pura haka them Ri-Bhoi kaba la rai ban shna haka shnong Iewmawlong naka liang u Conrad Sangma mar mar u la kular ban ai 50 lakh tyngka lyngba ka Chief Minister’s Development Fund bad MBDA bad ai khublei ruh Synjuk ki Rangbah Shnong Ri-Bhoi kaba la ïatreilang naka bynta ki kam pynroi ha Ri-Bhoi.
Ha katei ka jingïalang la sakhi ruh da ka jingdonlang u Bah Prestone Tynsong Symbud Myntri Rangbah ka jylla, u Timothy D Shira myntri ka tnad jngohkai pyrthei, u Bah Sosthenes Sohtun Myntri ka tnad C&RD, ki MLA ka Ri-Bhoi ba kynthup ïa u Bah Charles Marngar, Mayral Born Syiem, Celestine Lyngdoh, haka jingdonlang u Abhilash Baranwal Deputy Commissioner ka Ri-Bhoi ka kong BL Pakynteiñ Director ka tnad Tourism, u Giri Prasad SP ka Ri-Bhoi bad kiwei kiwei ki heh ophisar ka District, u Bah BB Makdoh Chairman ka Synjuk, Bah PB Sylliang Secretary lem bad spah ngut ki Rangbah Shnong na kylleng ka dong Ri-Bhoi.
Haba kren ha katei ka sngi naka liang u Myntri Rangbah ka jylla u la ong ba kane ka dei ka sien ba nyngkong ban ioh ïakynduh lang bad ki Rangbah Shnong ka them Ri-Bhoi naka bynta ban tei ïaka shnong ka thaw bad ka imlang ka sahlang lyngba ki kam pynroi bad mar mar u la kular ruh ban shimkhia ïaki mat ba ka Synjuk kala pynsngew hakhmat jong u khamtam ki mat ba kongsan kum ka kolej sorkar ha kaba ka sorkar kan pynbun ki People’s College haka jaka ban don tang kawei ka kolej sorkar, ban pynbiang ïaka bording khamtam ka jingshna ïa u 132KV ka dang ïaid shaid shaid, ka iew ki nongrep, ki kam pynroi haka thaiñ khappud khamtam ki lad jingsumar.
Haba ïadei bad u pud u sam naka liang u Myntri Rangbah u la ong ba hadien ba ka elekshon haka jylla Assam kala dep bad mynta haka sorkar kaba thymmai yn sa bteng biang ban ïakren bad u Himanta Biswa Sharma ha kaba ïadei bad u pud u sam bad naka liang u Myntri Rangbah ka jylla u la ong ba kane ka jingïakynduh ka long shisha kaba donkam bad kaba seisoh bad ai khublei ïaka Synjuk naka bynta ka jingïatreilang bad ka sorkar ban pynthikna ïaki kam pynroi ha Ri-Bhoi District.