Da kawei ka tarik pynbeit ka sorkar ban kynduh biang bad ki nonghikai Deficit bad College

Shillong, Jymmang 06 : Ka tnad Pule Puthi jong ka sorkar jylla kan pynbeit noh da kawei ka tarik na ka bynta ban ïa kren biang bad ki nonghikai jong ki deficit school bad nonghikai college ha ka 19 ne 20 tarik mynta u bnai ban ïa kren halor ka Meghalaya Non-Government School and College Employees Centralised Provident Fund Scheme, 2026.
Kane ka rai ka la mih hadien ba katei ka kynhun ki nonghikai ki la mih noh na ka jingïalang da kaba pynpaw ïa ka jingbym hun halor ka rukom pynlong ïa ka jingïalang.
Na ka liang u Commissioner & Secretary in-charge Education, u Vijay Kumar Mantri u la pyntip ba ka jingïalang kaban wan kan kynthup lang baroh ki nonghikai deficit bad ki nonghikai college da kaba yn ym kynthup shuh ïa ki heh na ki bank bad kumjuh na ki dkhot jong ka Board of Trustees.
“Kumta ngi la rai ba ngin don biang sa kawei ka jingïalang ha ka 19 tarik ne 20 tarik mynta u bnai bad ngin sa pyntip sha ki baroh,” ong u Mantri hadien ba la dep lum ïa ka jingïalang ha kane ka sngi Balang.
Shuh shuh u ong ruh ba ka department kan sa shimkhia ruh ïa ka ishu ba la rah da ka Meghalaya College Teachers’ Association bad ka Khasi Jaintia Deficit School Teachers’ Association, kiba la mih noh na ka jingïalang ha kane ka sngi.
Katkum ka jingong jong u, kaba ki nonghikai ki pyrshah ka dei namar ka jingdonlang ki nongtrei bank bad kiwei kiwei. “Ngi sngewthuh ïa ka jingsngew jong ki bad kumta ngi la rai ba ngin khot biang pat ha kawei ka sngi tang ïa ki nonghikai deficit bad ki nonghikai college ha ka 19 tarik lane 20tarik. Ngin sa sngap ïa kaei kaba ki don bad peit kaei kaba ngi lah ban leh,” u la bynrap biang.
Ha shwa kane u President ka KJDSTA u Bah Bosswell Pala u la ong ba ki ar tylli ki seng ki la mih noh na ka jingïalang namar ba “kam don jingmut” ban bteng ïa ka jingïakren ha ka jingbym don kiwei pat ki nonghikai deficit bad kawei pat na ka jingdonlang bad ki heh jong ki bank bad kiwei kiwei.