Ngim pyrshah ïaki kam pynroi, bun naki samla ki hap ban mih naka jylla ban leit trei shabar

Nongpoh, Jymmang 06: Ka Synjuk ki Rangbah Shnong, Ri-Bhoi District haka jingïalang bah mynta ka sngi kala buh ruh mat kyrpang ban ïatai ha kaba ïadei bad ka jingthmu jong ka sorkar ban wanrah ïaka 7-Star Taj Resort and Spa bad da ki spah ngut ki Rangbah Shnong kila leit ban shim bynta ban ai jingmut bad shim ruh ïakawei ka rai ban nym pyrshah than ïaki kam pynroi kiba kyntiew ïaka ioh ka kot ka jylla bad ka jingmyntoi ki khun samla.
Bun naki Rangbah Shnong kiba la shim bynta ban ïatai ha kane ka sngi kila pynpaw ka jingsngewsih ha kawei ka liang ba man ba wan ki kam pynroi shu ïa pyrshah beit, bad kiba bun hi ki dei na shabar ka district bad kam don kano kano ka jingïasyllok shuwa bad ki nongïalam shnong namar kum ki nongïalam shnong kila pynpaw ba ka project ba dei ban pyrshah kin pyrshah beit bad lada donkam waat ban shah thngan lang hynrei ki kam pynroi ki ban kyntiew ïaka jylla bad ka iohkam iohjam ki khun samla ngim dei than ban pyrshah namar ki samla jong ngi mynta khamtam kiba pule ïaka Hotel Management ki don hapdeng ka jingïakhun kaba khraw ha kaba ïadei bad ka iohkam iohjam bad bun hi ki hap ban mih naka jylla ban leit trei shabar, hynrei lada kane ka project kan urlong ha kane ka jylla kan long ka jingmyntoi kaba khraw ba ki samla kin iohkam ha shnong lade.
Kila ong ruh haba wan kano kano ka kam pynroi ym dei ban don shuwa ka jingthmu ban pyrshah hynrei ïakren ïasyllok shuwa la kata ka kam pynroi kan pynmyntoi ne em ïaka jylla bad ki khun samla namar ïa kaba dei ban pyrshah hap hi ban pyrshah hynrei ban shu pyrshah beit kat kaba wan te ym long, la ong ki katto katne ngut ki Rangbah Shnong.
Namarkata naka liang ki Rangbah shnong kila shim ïa kawei ka sur bad kawei ka rai ba kano kano ka kam pynroi ym ban lehstad shuwa kiba nabar ka district hynrei ai ba ki paidbah bad ki nongïalam shnong kin bishar bñiah bad kino kino kiba pyrshah ki lah ban ïakhih hynrei kim lah ban ïaid shakhmat khlem ka jingmynjur ki Rangbah Shnong kiba dei ki trai shnong, namar lada ki kam pynroi yn rah noh shawei kan long ka jingduhnong ïaka district kumta naka liang ka SRS kala rai ban nym pyrshah ïa katei ka project naka bynta ka jingmyntoi ka jylla bad ki samla haka iohkam iohjam.