Ka jingpynkhreh mynta ka long ban ker tawiar ïa ka Secretariat da u paidbah: Bah Ardent

Jowai, Jymmang 05: U President ba Rangbah jong ka kynhun saiñ hima sima ka Voice of the People Party (VPP) u bah Ardent Miller Basaiawmoit haka jingpynsngew paidbah jong u ïa ki mat jingdawa mynta ka sngi 5 tarik u Jymmang, 2026 ha Stand Ummulong Iawmusiang Jowai, ula kren shai ba ka jingpynkhreh mynta ka long lada sha ka sorkar ba ïalam da ka MDA-II kam lah ban pyntreikam mardor ïaki mat jingdawa yn lum syndon ïa u paidbah ban leit ker kut ïaka Secretariat da ki lak ngut ha kine ki kyndiat sngi ban pynkohnguh ïaka sorkar.
U Bah Ardent ula hiar sha Jowai mynta ka sngi ba ar ban leit pynsngew ïa ki 10 tylli ki mat jingdawa jong ka VPP kiba kynthup lang ïaka jingkhang tih dewïong hapoh ka jylla da kaba dawa ban ai lad ïa baroh lang salonsar ban tip dewïong kata naduh uba rit haduh uba heh bad ka kam tih maw tih shyiap.
Kine ki mat jingdawa ki long kaba nyngkong- ban dawa pyndam mardor ïa ka Projek ha u Lum Pongdeng, kaba ar- ïaki Eksamin thung kam dei ban long kiba khuid ba suba haki DSC bad MPSC bad ka sorkar ka dei ba kan weng noh ïa baroh ki dkhot kiba don ka jingïadei bad ka saiñ hima na ka DSC bad MPSC.
Kaba lai ban Burom ïaka hok ki Nonghikai- Weng ïa ki Polisi Pyrshah Nonghikai – Ka sorkar ka dei ban sangeh ka jingpynbor ïa ki nonghikai kiba la trei slem ban pass ïa ka MTET. La dawa ruh ban pynsangeh noh mardor ïa ka Meghalaya Private College Act 2025, kaba lah ban pyntroiñ ïa ki grant-in-aid colleges.
Kaba saw ban sangeh ka jingthung kam ïa kiba la shongthait – Ai Lad ïa ki Samla – Ka sorkar ka dei ban weng noh ïa ki nongtrei kiba la shongthait na ki kam ba la shu pynjlan bad ban pynsangeh noh ïa kane ka rukom kaba khanglad ïa ki samla ban ïohkam.
Kaba san la dawa ban pynneh ïa ka khyndew na ka jingshah lilam, ka jingaiwai ne die ïa ka khyndew paidbah sha ki company ne ki riewshimet, Bud ryntih ïa ki aiñ khyndew, bad ka riti dustur ki paidbah, Ym dei ban leh lyndet ïa ki Autonomous District Councils (ADCs) ha ki kam khyndew
Kaba hynriew dei ban khang ïa ka jingwan rung tuh ki mynder bad ïada ïa ki Nongshong Shnong ha ki Khappud-Ka sorkar ka dei ban pynsangeh ïa ka jingwan rung tuh ki mynder shapoh Meghalaya, la dawa ba ka sorkar ka dei ban ai jingïada mardor ïa ki briew kiba don ha ki jaka khappud ba kin lah ban trei ïa ki kam kiba ki ju trei barabor.
Kaba hynñiew la dawa ba ka sorkar ka dei ban pynsangeh noh ïa ka jingplie thymmai ïa ki kharkhana shna coke bad cement, khnang ban ïada ïa ka Mariang bad ka koit ka khiah jong u paidbah bad ban weng noh ïa ki kharkhana kiba treikam be-aiñ.
Kaba phra dei ban leit Jurip bad beh noh ïa ki mynder kiba rung bad shong Be-aiñ.
Hadien kine ki 8 tylli ki mat jingdawa la mih ka jingud naki nongkhaïi dewïong bad na ki nongtrei maw trei shyiap kiba la pynsngew sha ka VPP ban kynthup lang ha ki mat jingdawa kiba don mynta 10 tylli.
U bah Ardent ula ong ka VPP kam pyrshah ïa ka jingtip dewïong hynrei ban tip dewïong dei ban ailad ïa baroh lang salonsar naduh uba rit bad haduh uba heh kumba long ha ki por mynshwa, khnang ban ïa im lang kumjuh ruh haka kam tih maw bad tih shyiap.