Sha ka 770 klur tyngka kiew ka New Shillong WSS ba hap pynkynriah ïa ka dam najan ka jaka ban theh niut

By Mawphor Editor On May 6, 2026

Shillong, Jymmang 5 : Ka jingpynlut ïa ka Phase-I ne ka bynta ba nyngkong jong ka New Shillong Water Supply Scheme kala kiew da 217 klur tyngka kata mynta ka la kot sha ka 770 klur tyngka, namar ka jingpynkynriah ïa ka dam, ka jingring bording bad ka jingthied jaka na ka jaka ba mynshwa namar ka ïajan palat bad ka jaka ba la pynkhreh ban shna ïa ka jaka bret niut. ïa kane ka jingmang pynlut ba thymmai lah ai jingmynjur da ka Kynhun Myntri ha ka sngi Ba-ar.
U Myntri bad nongaiktien ka Sorkar MDA u Bah Wailadmiki Shylla ula ong ba ka jingmang pisa ba mynshwa ka long 553 klur tyngka. “Ka Kynhun Myntri ka la mynjur ïa ka jingmang pynlut ba thymmai jong ka New Shillong Water Supply Scheme Phase-I. Kane ka jingmang ba thymmai ka long 770 klur tyngka na ka 553 klur tyngka” ula ong.
ïa ka jaka shna dam la hap ban pynkynriah noh shaneng jong ka wah hadien ba ka Sorkar ka la ithuh ïa ka Nonghali kum ka jaka kaba biang eh ban buh ïa ka jaka theh niut kat kum ka juk saian.
“Kane ka dei namar ka jingpynkynriah ïa ka jaka ban shna ïa ka dam ha kaba ngi la hap ban rah shaneng jong ka wah da ka jingjan jong ka jaka theh niut kat kum ka juk saian ha Nonghali” batai u bah Wailad.
Kila don ruh kiwei ki jingpynlut na ka bynta ban pynïaid ïa ki laiñ bording na ka bynta ka project. Ka jingdonkam ban thied jaka ruh kala nang pynheh ïa ka jingmang pisa.
“Ngi hap ban don ïa ki laiñ bording ba dei thik ïa kane ka kam kane ruh ka la nang pynheh ïa ka jinglut bad ha kajuh ka por namar jong ka jingthied jaka naba ngi donkam bun ka jaka” ula ong.
Hapor ka por ba rai ban pynkynriah, u Bah Wailad ula ong ba ka jaka ban pynlong jaka theh niut ka dei kaba wan hadien bad ym pat shym la shim rai satia ha ka por ba plan ïa ka Water Supply Scheme.
“Kane ka long namar hashuwa ka rai ïa ka jaka theh niut, shibun ki EOI ki la wan. Kumta ha katei ka por, ngim tip satia kano ka jaka ka dei kaba biang eh. Ynda ki la leit sorjamin ki la tip ba ka Nonghali ka dei kaba biang” ula ong.
U bynrap ba ka plan jong ka Tnad PHE na ka bynta ka Water Supply Scheme kala dep don lypa hashuwa katei ka jaka theh niut.