Halor ka jingpynbna ka JHADC kum ka jingithuh ïa ki kur ki jait ki bymdei tynrai na Jaiñtia

Khliehriat jymmang 5: Ka Jaiñtia National Council (JNC) Central Executive Committee hapoh ka jingialam jong u General Secretary bah Wanshwa Suting kala leit ban pan jingshai ryngkat bad ka jingthoh hakhmat ka Secretary Executive Committee ka JHADC ka kong B. Bamon ha kaba ïadei bad ka kam kur kam jait hapoh ka jingpeit ka council bad kane ka dei namar ba ka Jaiñtia Hills Autonomous District Council ka la mynjur ïa ka thup ba ar ban ithuh ïa ki jait kur kum ki trai ri trai muluk ha ka ri lumJaiñtia (Ri Jaiñtia), ka seng ka la buh bun ki jingkylli bad dawa na ka JHADC ba ka dei ban jubab hapoh 14 sngi ïan ki jingkylli ba ka seng ka la buh bad lada ka JHADC kam lah ban jubab hapoh kane ka por, ka JNC kan hap ban shim da kiwei pat ki sienjam bad ki kam katkum ba ka sngewdei ban leh.
Na ka liang ka JNC ka la ong “Ka JHADC hadien ba ka la pynrung ïa ki jait kur jong kiwei pat ki jaitbynriew bapher bapher kum ki Biate, ki Karbi, ki Hmar, bad kiwei kiwei ki jaitbynriew ki bym dei ki na ka tynrai jong ngi. (Jaiñtia) tang naka daw ba ki la shong slem ha Jaiñtia bad Kane ka jingleh jong ka JHADC ka lah ban don ka lad ban wanrah ïa ki jingeh bad jingkulmar kaba khraw ha ri lum Jaiñtia hadien habud ha ki pateng ki ban wan”
Katkum u kyrwoh ba la phah da ka JNC la ong ba ha ka jingiakynduh bad iakren bad ka kong B. Bamon, ka la kubur ïa kane kum ka mat kaba sngewkhia shibun, ka sneng bad kyrpad tyngeh ïa ka ophis jong ka JHADC ba ka dei ban pynshai halor kiba bun ki mat kiba ïadei bad kane kaba ka JNC ka la wanrah hakhmat jong ka.
Na ka liang ka Jaiñtia National Council ka la buh jingkylli ïa ka JHADC ba kiei ki seinjam bad ki jingpynshisha kiba ka JHADC ka la shimkhia ban pynbna ïa kine ki jaitbynriew kiba ka council ka la pynrung hapoh ka thup jong ki kur kiba na ka Ri lum Jaiñtia kum ki nongshong shnong bad ki trai ri kiba hap hapoh ka jingpeit jong ka JHADC, khamtam kito ki jaitbynriew kiba la buh kyrteng hapoh ka “Annexure II (B) OTHER CLANS RECOGNISED AS INDIGENOUS TRIBE BY PROLONGED SETTLEMENT, hato Kane ka rukom leh Jong ka JHADC ban ithuh ïa kine ki jait kur jong kiwei pat ki jaitbynriew riewlum hapoh ka thup Jong ki kur ka Ri Jaiñtia, kaba long trai daki Pnar, khasi kan ktah ne em ïa ka hok long trai jong ki trai ri ha baroh arliang??
Shuh shuh la kylli ba Kiei ki lad iada ba ka JHADC ka pynkhreh naka bynta ban iada ïa ka hok long trai ki trai ri trai muluk kiba dei u Pnar, khasi, khamtam ha kaba ïadei bad ka bhah thungkam thungjam.
“Ka JNC kam lah ban pdiang ba ïa ki jaitbynriew Biate, Karbi, bad kiwei kiwei ki jaitbynriew (Riewl?m) ban kheiñ ïa ki kum ki jaitbynriew tynrai (Tre Chnong) ha ka Ri Jaiñtia, namar ka histori jong ngi (Jaiñtia) ka pyni shai ba ngi ïapher bak-ly bak na kine ki jaitbynriew naduh ka riti dustur, ka Ktien thylliej bad ka riam ka beit, namarkata, ka JNC ka dawa na ka JHADC ban pynshai shuh shuh, hato kiei de kita ki trai ri trai muluk (Khon ka Ri Jaiñtia) kiba long shisha kita ki trai kiba bat ïa ka hok jong ka khyndew ka shyiap (Tre Ri) hapoh u pud u sam jong ka JHADC?”
“Ngim don kano kano ka daw, ka jingwit ne jingthut bad kiwei pat ki jaitbynriew riewlum kiba don bad sah slem hapoh ka Ri Jong ngi, hynrei ngi donkam ruh ban pynneh pynsah ïa ka hok long trai ka jong ngi, ka hok jong ngi naka bynta ka lawei ka jaitbynriew jong ngi” ong u kyrwoh na ka JNC.