Jowai, Jymmang 04: Ki ar ngut ki samla pule jong ka North Liberty Higher Secondary School, Mookyrdoop-Jowai kila ïoh ban rung haka ‘Top-10’ jong ka result Higher Secondary School Living Certificate’ (HSSLC) Examination, 2026 haka Arts bad ka Science Stream bala pynbna daka Meghalaya Board of School Education (MBOSE) mynta ka sngi 4 tarik u Jymmang, 2026.
Kane ka jingjop jong kitei ki samla pule ka North Liberty Higher Secondary School, Mookyrdoop-Jowai (Science) ka la wanrah burom ïa ka ïing ka sem jong ki bad ïa ka skul hi baroh kawei.
Kine ki samla pule jong ka skul kiba ïoh ban rung Top-10 ki long ka Hakiru Challam haka Science Stream kaba la wan haka kyrdan (8th Position) da kaba la ïoh Distinction haka subject English: 87, Khasi (MIL: 89, Mathematics: 95, Chemistry: 89, Biology: 94 bad ka Physic: 80 bad ka total mark baroh kala poi sha ka 454.
Katba ka samla Mewarica Pariat kala poi haka kyrdan (10th Position) jong ka Arts Stream, kaba la ïoh Distinction haka subject English: 85, Geography: 92, Economic: 80, Education: 89, Political Science: 85 bad ka Alternative English: 80 bad ka total mark baroh kala poi sha ka 431.
Na ka liang u Principal jong ka skul u bah Richard B. Uriah ula pynpaw ka jingsngewkmen halor ka jingpoi ba shakhmat jong kitei ki kynnah pule bad ula kitbok kit rwiang ïa kitei ki ar ngut ki samla pule ba kin dang kiew shaphrang haka jingpule na ka bynta ka lawei ba phyrnai jong ki.
