Sha Secretariat yn leit mih ka DS Lapangap, lada ym lah ban pynbeit ïa ka jingeh ki nongrep

Jowai, Jymmang 03: Ka Dorbar shnong Lapangap kaba hap hapoh ka West Jaiñtia Hills District bad kawei na ki shnong kaba don ha khappud bad ka jylla Assam jong ka West Karbi Anglong District, hynrei ki paid nongrep na katei ka shnong ki dang bteng ban mad ïa ki jingeh bad shah pynthut manla u snem khamtam ha ka por ban sdang aiom rep.
La ïathuh kane ka jingshah pyndik jong ki nongrep ka jylla haki nong Karbi bad ki pulit Assam ha ka por ba leit rep kala bun jingeh bad duh jingkyrmen ban ïoh rep ïa u kba u khaw, hynrei ka jingdon ki pulit Assam bad ki briew nong Karbi na Tahpat kala long pynban ka jingthut ïa ki paid nongrep kiba dei ki Pnar.
Halor kane ka jingeh naka liang ka Dorbar Shnong haka 1 tarik u Jymmang, 2026 kala shim syndon ïa ka rai ban leit tur noh Secretariat Shillong haka 6 tarik u Jymmang ban pynsngew ïaki mad jingdawa kiba hakhmat eh kum ki nongrep bad ki nongshong shnong ki ïa kynduh.
Haba ïakren bad u Waheh Shnong ma Deimonmi Lyngdoh, ula ïathuh kum ka shnong kala dep rai ban pynlong ïa kane ka jingleit rally kaba jai jai sha Secretariat, hynrei la ïoh jingtip na ka liang u DC ka WJHD ula khot ban ïakren pynbeit ïa kane ka jingeh haka 5 tarik u Jymmang, u ma Lyngdoh ula kren shai lada ka jingïakren bad ki kam kim urlong satia ka Dorbar Shnong kam banse ban leit da kaba jai jai sha Shillong
La pyntip ba ka mat kaba nyngkong kum ka shnong ka don ban dawa na ka sorkar ka long ba ki paid nongrep ka thaiñ ki dei ban ïoh leit rep da kaba suk ba saiñ sha ki pynthor kba kiba don ha khappud bad ka Assam.
Kaba ar ïa ki pulit Assam kiba don ha Lum pynthor dei ban weng noh shi syndon ïa ki, na katei ka jaka katba ym pat dep ka jingpynbeit ïa u pud u sam hapdeng ki ar jylla, namar ka buh jingthut ïa ki nongrep bad ïa ki nongshong shnong ka Lapangap,
Kaba lai ka jingdawa ka long ha kaba ïadei bad u GPS line uba paw ha Google Map, la kyrpad jur ïa sorkar ban pynbeit ban weng noh ïa u namar une u line GPS ula pynshaduh ïa ki nongshong shnong ka thaiñ.
Kaba saw ka long ha u snem 2025 kum ka Dorbar Shnong kaba dep ban dawa ïa ki bor sorkar ban ai jingïarap pisa sha ki nongrep kiba shah ktah haka kam rep kam riang naduh ka por ba sdang rep bad haduh ka por ot na ka jingshah pynthut ha ki briew jong ka Assam.