Da jingkyrshan u CM ngi la lah ban pynïoh ka bylla 100 sngi ha Madanriting : Lambor

Shillong, Jymmang 03 : Ka shnong Madanriting da ka jingiarap borbah jong u Myntri Rangbah ka jylla u Conrad K Sangma bad da ka jingtrei shitom u MLA bad MDC barim ka Nongkrem u Bah Lambor Malniang ki la lah ban pyllait noh ïa kane ka shnong na ka Cencus Town kaba hap tnad Urban bad Municipal.
Ïa kane la pynpaw da u Bah Lambor Malniang u la kren ha ka jingïalang ban pyllait paidbah ïa ka kali kit nongpang bad ïa ka kali kit met ïap kaba la long ha ka sngi Saitjain, ha St. Peter’s Secondary School.
“Dei ha u snem 2021ba u Conrad K Sangma uba dei u Myntri Rangbah ka jylla u la kyrshan tyngeh ïa shnong Madanriting ban pyllait noh na ka jingpeit jong ka tnad Urban bad Municipal napoh ka Cencus Town” ong u Bah Lambor.
U Bah Lambor u la ong, “Da ka jingiarap u Myntri Rangbah bad ha ka jingiatrei lang bad nga, ngi la leit sha ka Ministry of Rural Development bad kynduh ïa u Myntri Sorkar bankyrpad ban pyllait noh ïa ka shnong Madanriting na ka Cencus Town”.
Shuh shuh u Bah Lambor u la ong, Mynta ka shnong Madanriting kala lait na ka Cencus Town bad kala ioh ïa ka bylla 100 sngi ne ka scheme MNREGA bad ka jingpynrung kyrteng mynta kala poi haduh 500 ngut tam bad kane kala ïarap shisha ïa ki long ïing kiba duna ha ka ioh ka kot.
U la pynpaw ruh ba ka khuid ka suba hapoh ka shnong ka thaw la sakhi bad la lit ruh na ki jingsma ba bun rukom.