Ther ka Raid Nongpoh ïa kiba thmu kam trai jubor ïa ka jaka Raid

Nongpoh, Ïaiong 02: Ki nongïalam ka Raid Nongpoh ryngkat ki 7 kur 7 kpoh mynta ka sngi kila ther tyngeh ïa ki katto katne ngut ki briew kiba la kam kum ki nongrep ha u lum Wortoh ne u Lum Kyntang jong ka Raid Nongpoh kiba kiba la leit ban thombor ha ophis ka Raid dang shen, bad ka jingthmu jong ki ban kam trai jubor ïaka jaka raid ryngkat ki jingkynnoh kiba pynïalam bakla.
Haba kren sha ki lad pathai khubor naka liang u Bah Linus Lyngdoh, u ba dei ruh u Lyngdoh Raid ka Raid Nongpoh u la pynshai ha kaba ïadei bad katei ka jingjia naka liang ka Raid Nongpoh kala khot tang 4 ngut ki nongïalam jong kitei ki briew kiba la kam nongrep ban pan ka jingshai halor ka shithi ba kila thoh sha ka Raid khlem don ka jingsoi bala shu thoh kum ki khynnah rit, kumta ka Raid kala khot ïa kitei 4 ngut hynrei kila wan pynban da u paid bhur bad rung jubor haka ophis ka Dorbar Raid khlem da burom shuh ïaka Raid bad ring video ruh la katba ki nongïaalam raid ki dei ki nongleh kam sniew ne ki nongkhaii drok nalor ka jinghukum jong ki ïaka raid ban pynlong jingïalang.
Ki ong ruh ba ki rep naduh u snem 1972 hynrei to tip ba mangi ki 7 kur pat kiba la seng ïa kane ka Raid ba dei ki trai ri trai raid ngim nud ban skud ïa kane ka jaka namar ngi tip shai ba ka dei ka jaka bad u Lum Kyntang jong ka Raid Nongpoh ba ngi dei ban pynneh pynsah pateng la pateng ym ban shu dakhol ha kyrteng ki nongrep la ong u Bah Linus.
Haba iadei bad ka jingaiti sha ka tnad Soil and Water Conservation naka liang u Bah Linus u la pynshai ba kam dei ba ngi die duh kumba la kynnoh hynrei kane ka tnad sorkar kan pyntrei ïaki project ban pynneh pynsah ïaka mariang ban thung dieng, ban pynbha ïaki tyllong um naka bynta ka jingmyntoi jong ki paidbah kiba shong sawdong u ne u lum tang hapoh 3 snem bad hadien kata kan sa aiti biang sha ka Raid.
Hynrei kumba long mynta ki khlaw kila syllen, kila pom dieng pathar bad thang dusmon haka kyrteng jong ka rep, la mih tang da ki synsar ki kwai haki tyllong um, bad ki tyllong um kila sdang ban duh noh, ngi trei shitom ban sumar bad pynneh pynsah ïaka mei mariang hynrei lada ki pyrshah ïa kane ngim banse ban shim da kawei pat ka sienjam la byrngem u Bah Lyngdoh.
“Kum ka Dorbar Raid ngi pynrem jur ïaka jingleh donbor jong ki pyrshah ïaka Raid, kumba kila kynnoh ba ngi thombor ïaki iing ki sem hynrei kam shym don kano kano kata ka jingïaid lait naka jingpyntip jong ngi ïaki bad kam don ruh ka jingdakhol ïaki mar rep kumba la kynnoh namar kane ka kam la sdang ha shuwa ka jinglong Lyngdoh jong nga ha kaba la don ka jingïalang hapdeng ki nongrep bad ka Raid ryngkat ka jingkren shai ba kino kino ki nongrep kim lah ban kam trai ïaka khyndew namar ka jaka hi ka dei jong ka raid bad naka liang ka raid ka la bthah ruh ba kim dei ban thung ïaki jingthung ba neh slem kiba pyntyrkhong ïaka khyndew ka shyiap namar ka roi ka par ka lah ban wan ha kano kano ka por khnang kan nym don jingthud kumta ka Raid kala phah ban thung da ki jingthung kiba shipor kumba la rai haka 21/6/ 2022” la ong u Bah Linus.
U la ïathuh ruh ba haka 21/01/2023 kala don biang ka jingïalang hapdeng ka Raid bad ka kong Khrolity Marwein, Banasar Lyngdoh Nonglait bad u Bah Banker Marwein bad ka Raid ha kane ka meeting kala kren markhmat da lei lei kim lah ban kam trai ïaka jaka ba kila rep ha kano kano ka por ka roi ka par ka lah ban wan kumta ka Raid ka lah ban shim biang khlem da khnium ne pynmih kano kano ka jingpynkulmar bad shuh shuh ka raid kala phah shithi sha u Rangbah shnong ka Umlyngkdait haka 31 .01.2023 ba ka Raid kala phah pyntip lyngba u Rangbah Shnong ba baroh kiba rep kim lah ban kam trai bad lada don kino kino ki jingthung ki dei ban pynkynriah noh na katei ka jaka.
Ka Raid kala ong ruh ba kito kiba don ïaki pata ne dulir bala ioh naki nongïalam barim la kyntu ïaki ban wan shakhmat khnang ba ka Raid kan lah ban pynbeit hynrei napdeng jong ki ym don uwei ruh ba wan bad shuh shuh ruh hadien ka jingshimti jong u kum u Lyngdoh haka 03.05.2025 naka liang ka raid kala pynbna paidbah ba ka raid kan nym ithuh ïa kino kino kiba rep ha katei ka jaka khlem ka jingthoh, bad lada ki don kino kino kiba la don ïaka pata rep jong ki ruh ki hap ban wan mih sha ka Raid khnang ba ka raid kan lah ban pynbeit, hynrei ym don satia ba wan mih.
Kumta haba wan kane ka project jong ka Soil and water conservation ngim nang ban khot namar ym shym la don ba wan mih khamtam lei lei kane ka dei ka jaka jong ka Raid bad kam dei rukom ïangi ba ngi hap ban leit pan jingbit naki hynrei ka dei ka kamram jong ki ban wan mih sha ka Raid.