NEW DELHI, ïaïong 27: Hadien ka jingpynkhreh kaba jur bha ha Gurugram, ka kynhun phutbol U17 ki kynthei jong ka ri India, kynthup ïa baroh arngut ki thei ïalehkai ba kynsai ba ka jylla Meghalaya ka la pynmih, ka Alisha Lyngdoh bad ka Bonifilia Shullai, ki la wanpoi ha Suzhou hynne ka sngi Nyngkong, 27 tarik ïaïong, shuwa ban sdang ka lympung AFC U17 Women’s Asian Cup 2026 ha China ha u bnai ban wan (Jymmang).
Ka India, kaba la ïohrung sha kane ka lympung hadien 21 snem, kan sdang ïa ka jingïakhun jong ka pyrshah ïa ka Australia (02 tarik Jymmang, 5 baje janmiet), bud sa ka jingïalehkai pyrshah ïa ka Japan (05 tarik Jymmang, 5 baje janmiet) bad ïa ka Lebanon (08 Jymmang, 1 baje nohphai sngi) ha ka Group B. Baroh ki jingïalehkai jong ka India kin long ha Suzhou Taihu Football Sports Centre.
Ki ar tylli ki kynhun kiba wan ha khlieh duh na kawei pa kawei ka Group ryngkat bad ar tylli ki kynhun ba pyndep kyrdan ba lai kiba kham kynsai (best third-placed team) napdeng ki lai tylli ki Group kin jam sha ka wat ïakhun Quarter-Final. Shuh shuh, ki saw tylli ki kynhun kiba jop ïa la ki jong ki jingïakhun Quarter-final kin ïohrung sha ka FIFA U17 Women’s World Cup 2026 ban long ha Morocco.
ïa ki jingïalehkai jong ka AFC U17 Women’s Asian Cup China 2026 yn pyni live lyngba ka AFC Asian Cup YouTube Channel.
Ka kynhun India ka la wanpoi ha Suzhou ha ka por mynstep jong ka sngi Nyngkong, 27 tarik ïaïong, bad ka la pynlong ïa ka prokram kilanmet kaba nyngkong ha ka por janmiet.
Hapoh ka jingïalam jong ka Pamela Conti, kaba na Italy, kum ka head coach, kaba la shah thung ha bnai Kyllalyngkot, ka India ka la ïoh ban pynlong ïa ki prokram kilanmet kaba bteng kaba la palat lai bnai, kaba bun eh la pynlong ha Bengaluru.
Kum ka kynhun ïalehkai U17, ka India ka la jop ïa ka burom lahduh jong ka SAFF U19 Women’s Championship ha u bnai Rymphang, bad ha u Lber, ki la jop ïa ar tylli ki jingïalehkai paralok pyrshah ïa ka Myanmar ha Yangon. Kham mynshwa mynta u bnai (ïaïong), ka kynhun ka la ïakhun lai tylli ki jingïalehkai paralok pyrshah ïa ka Russia ha Sochi, bad watla ki la shah rem ha baroh lai sien, hynrei ka la ai pat ïa ka jingshemphang bad ka jinghikai kaba kordor da kumno ban aireng pyrshah ïa ki kynhun ba khlaiñbor hashwa ka jingïakhun jong ka kynhun ha ka lympung bah jong ka dewbah Asia.
Hadien ba ki la wanphai na Russia, ki thei ïalehkai ka India ki la bteng ïa ka jingkilanmet jong ki ha Gurugram naduh ka 20 haduh 26 tarik ïaïong shwa ba kin leit sha China.
