Ka Indian Meteorological Department ka la ïathuh lypa ba ha kine ki san sngi ban wan ka mariang ka jinglong ka suiñbneng kan ïai bteng beit kumne kata ban slap lynter bad lehse bad ka lyer kaba jur kaba haduh 40 haduh 60 Kmph. Kumta na ka liang ki bor synshar District bad ka Sorkar ruh ki la ai ka jingmaham bad jingbthah ïa ki paid nongshong shnong ba kin long kiba phikir bha ha ka ïaid ka ïeng ka leit ka wan jongki khnang ban lait na kino kino ki jingjia ba sngewsih. Khamtam lei lei donkam ban bat pyrkhing ïa ki jingmaham bad jingbthah ki bor ba dei peit ban kiar na ka leit ka wan na ka surok kaba dang pyntrei mynta na Shillong-Pynursla bad Dawki. Namar kumba long ka jingpynbthei dynamite bad ka jingtih ïa ka surok ka la pynsynjor lut bha ïa ka khyndew bad ki maw kumta ban ym jia biang ki jingjia ba sngewsih donkam ban kohnguh ïa ki jingbthah.
Ym tang ha katei ka surok hynrei haba leit ba wan sha kino kino ki jaka ruh haba ka suiñbneng ka long kumne donkam hi ban da husiar. Nalor kata lada jia ba wan lyngshop ki bor mariang ruh ym dei ban ïa hersyrngiew kulmar hynrei dei ban long kiba jai jai ban lait na kino kino ki jingmynsaw. Bun sien ngi kum ki briew haba jia kino kino ki jingshah lyngshop ngi tieng ngi kyiuh shaba palat pud teng teng tang na kane ka jinglong poi pynban sha ka jingmynsaw ne jingiap. Kumta haba jia kino kino ki jingshah lyngshop dei ban long jai jai khnang ban lah ban ïada ym tang ïa lade hynrei wat ïa kiwei ruh.
Khnang ban ïa tip shai ngi dei ruh ban pule bniah ïa ki jingbthah jongki bor synshar district kiba long kumne : Khmih bad pynskhem bha ïa ki tiar ki tar kiba lah ban shah rong ha ka lyer kum ki thup dieng, ki tin sop lane mawit ba shong synjor, ki tin/ sop theh nuit, ki sign board bad kiwei kiwei ki mar kiba lah ban shah rong ha ka por ba jur lyer.
Lada ka jingba leilieh ka long kaba jur bad nehslem kan bha ‘shibun ban nym pyndonkam ne ban pynmeh ïa ki tiar elektrik kum ki mobile, isteri, radio, telebision bad kiwei kiwei ki tiar kiba pyndonkam da ka bor elektrik.
Ki nongshong shnong ki dei ban long kiba phikir ban ïada ïalade namar ka jingshlei um ka lah ban jia hadien jong u lapbah khamtam ha ki jaka kiba harud jong ki wah bad ki wahduid.
La kyntu ïa ki paitbah ban kiar na kaba jam ïa ki wahduid, ki wahbah bad ki kshaid ha ka por ba jur slap. Phim thikna ïa ka bor jong ka bad ka um kaba jyndong bad tuid sted ka lah ban pynkyllon ïa phi.
Wat tur ne ñiah ïa ki kali haba don ka jingshlei um bad kiar na ki post electrik ban lait naka jingshah bat ha ki bor electrik. Phone ha u 112 lada donkam jingïarap haba don kino kino ki jingjulor.
La kyrpad ïa ki paitbah ban long kiba phikir bad shim ïa ki lad jingïada ban lait na kino kino ki jingmynsaw. Nga ngeit skhem lada ngi bud pyrkhing ïa kitei ki jingbthah kan ym jia kano kano ka jingjia ba sngewsih hynrei lada ym patiaw ne leh bym salia wat kattei la kren shai ruh ka jingma ka ap kum ïa kita.
