M’laya State League 5: Jop bun kol ka Lajong, Nangkiew Irat & Khimusniang; ïakhaid biang ka Mawlarshong bad ka Rangdajied

Shillong, ïaïong 27: Ki kynhun kiba khlaiñbor kum ka Shillong Lajong FC, ka Nangkiew Irat SC bad ka Khimusniang SC ki la bteng ïa ka jingjop da kaba thep bun kol hynne ka sngi Nyngkong ha ka 5th Meghalaya State League. Hynne ka sngi la sakhi ïa ka jingjur u slap ha kylleng ka jylla, kaba la pynlong ïa ka jinglong jingman jong ka madan kaba eh ïa ki nongïalehkai. Ka jingïakhun jong ka Group F hapdeng ka Lawbah SC pyrshah ïa ka Mishon SSCC ha Mairang kam shym la lah ban long satia namar ka jinglong jingman jong ka madan kaba sniew bad la hap ban pynkynriah biang ïa ka por.
Ha Mawkyrwat, ka jingïakhun jong ka Group H hapdeng ka Mawlarshong SC bad ka klob ba radbah na Shillong ka Rangdajied United FC ka la kut ha ka jingïakhaid khlem da don ba thep kol (0-0). Ka jingïakhun ha ka wat nyngkong (1st leg) ka la kut noh da mar 1-1 kol bad ka Mawlarshong mynta ka la lah ban ïaid khlem shah rem ha ki ar tylli ki jingïakhun pyrshah ïa ka lahduh jong ka MSL 2023.
Ka resol ka la long kumjuh ha Williamnagar, ha kaba ka jingïakhun hapdeng ka Janepih YSCA pyrshah ïa ka Balmanduri FC ka la ïaid khlem kol haduh 90 minit. Shuwa kane ka jingïakhun ka Janepih ka la jop ïa baroh lai tylli ki jingïalehkai ba ladep jong ka ha ka Group H.
Ha Khliehriat, ka Thangskai Tiger SC ka la wanphai na ka shi kol ban pynliem ïa ka Jalaphet Moochut Pyrdung SC da 2-1 ha ka Group D. Hadien ka jingïalehkai kaba khlem kol ha ka kylla step, u Thomas Dkhar (53′) u la buh hakhmat ïa ka Jalaphet Pyrdung hynrei ka Tigers ka la ïakhun tyngeh ban thep ar kol lyngba u Wendi Markson Nongtdu (72′) bad u Solmon Sympli (87′).
Ha ka Group C la sakhi ïa ka Amlarem SC kaba la jop da 3-1 pyrshah ïa ka Lamin XI SCC. U Iaid Da Kyrmen Jungai (4′) bad u Marshial Nongrum (27′, 83′) ki la pynkhihjar na ka bynta ka Amlarem SC shuwa ba u Densil Kongwang (78′) un pynphai kawei na ka bynta ka Lamin XI.
Ka lahduh jong u snem 2019, ka Shillong Lajong ka la jop suk da 5-0 pyrshah ïa ka Iatyllilang Lumsehkot CSC ha ka Group E ha Wahiajer. ïa ki kol la thep da u Lalmuansanga (25′), u Colinsalmon Lyngdoh (56′), u Iohborlang L Lyngkhoi (70′), u Ricky Kharkongor (89′) bad u kapten u Wilbert D Marbaniang (90’+4).
Ka jingmih ka la long kumjuh ha MFA Ground, Shillong, ha kaba ka Nangkiew Irat ka la pynjemkhnap da 5-0 kol ïa ka Mawlum Tyrsad SCC ha ka Group B. U Wallamsuk Nongkhlaw (75′, 85′, 90′) u la ïoh hat-trik wat hadien ba u la mih madan na ben shong ha ka kylla miet, katba u Neblejohn Lyngkhoi (7′) bad u Banshanlang Nongdhar (63′) ki la thep mar kawei.
Khatduh eh ha ka Group A, la sakhi ïa ka jingïalehkai kaba khlaiñ na ka Khimusniang, kaba la pynliem ïa ka Umkaber SCC haduh 9-0 ha SSA Stadium, Shillong. U Primrose Lamat (3’, 45’+2) u la pynkhihjar arsien ban kyntiew ïa ka jingkheiñ thep kol shimet jong u sha ka 9 kol mynta, katba u Meroily Lytan (12′, 89′), u Dashngain Sukhlain (30′), u Dawanbiangmi Passah (36′) bad u Civility Khongmalai (69′) ruh ki la ïoh ban kyntiew ïalade ha ka thup ki nongpynkhihjar. Ka la don ruh ka kol ha ka minit kaba 16 kaba la kum thep hi (own goal) da u rangïalehkai ka liang pyrshah.

Ka prokam ïalehkai ha kane ka sngi Ba-ar (Baroh ban sdang ha ka por 3 baje nohphai sngi):
Group A (Shillong SSA Stadium) – Mawshun SCC vs Nongkseh SSCC
Group B (Shillong MFA Ground) – Mulang SC Nongbah vs Mawphu SC
Group C (Amlarem) – Mawlai SC vs Laskein SCSC
Group D (Khliehriat) – Rymbai Shkenshynriah SC vs Ladthadlaboh SC
Group E (Wahiajer) – Lamyrsiang SCC vs Lumphyrnai Sohphoh FC
Group F (Mairang) – Umlakro SC vs Langsning FC
Group G (Williamnagar) – Maram FC vs A’chik SCO Rongjeng
Group H (Mawkyrwat) – Seng Samla Umdang Pyllun vs Mawten SC