Nonghyllam, Ïaïong 27: Ka lympung jingïalehkai kriket kaba la tip kum ka 3rd Invitation Cricket Tournament 2026 ba la pynlong da ka UDP Youth Wing Nonghyllam Unit ka la poi noh sha kaba kut ha madan ïalehkai Nonghyllam, ha kaba la sakhi ïa ki jingïalehkai kiba itynnad bad kiba khlaiñ hapdeng ki kynhun kiba la ïashimbynta.
Ha ka jingïalehkai phainal kaba itynnad bha, ha kaba ka Rainbow Warrior Nonghyllam Cricket Team ka la long kum ka lahduh, da kaba pyntikna ïa ka jingjop kaba rit da 5 ron pyrshah ïa ka Rajapara Cricket Team kaba la wan ba ar.
Kane ka jingïalehkai ka la long kaba pynsngewtynnad ïa ki nongpeitkai kiba la shong ha ka tduh jong ki jaka shong, kaba pynpaw shai ïa ka mynsiem jingïalehkai kaba shlur bad jingïatylli.
Haba kut jong ka jingïalehkai la sam ïa ki khusnam sha baroh ar tylli kata kaba jop ka la rah ïa ka khusnam kaba T. 1,50,000/- bad kaba wan ba ar ka la ïoh T. 75,000/-.
Hadien kata la sam ruh ïa ki khusnam shimet kata u Rongan Marak ula ïoh ïa ka khusnam kum u ‘rangïalehkai ba tbit namar ka jingnoh synniang ba radbah jong u ha ka phainal. Katba ïa ka khusnam ‘rangïalehkai ba tbit ha ka lympung la pynkup burom ïa u Devetion Lyngdoh namar ka jingïalehkai kaba ïaineh bad kaba kyrpang jong u ha baroh kawei ka lympung jingïakob.
