Sngewkulmar jingmut ki College bym pat ai ka NEHU ïa ki syllabus jongka Semester ba hynniew

Shillong, Iaiong 25: Ki College kiba don ha ka jylla Meghalaya kiba la pynïasoh bad ka North Eastern Hill University (NEHU) ki don ha pdeng ka jingkulmar jingmut la kin pynïaid sha khmat ïa ka semester kaba hynniew ne kin pynkut noh tang ha ka semester kaba hynriew.
Ki thymmei khubor kiba la ïoh ki iathuh ba ki nongpynïaid ïa ki College ki don ha ka umdum ka daw ka long ba kine ki samla pule kiba la don mynta ha ka semester kaba hynriew kin sa thoh ïa ka phainal eksam ha u bnai Jylliew, hynrei haduh mynta na ka liang jong ka NEHU kam pat ai kano kano ka jingbthah sha ki college ïa ki lynnong ne ki syllabus ba kin hikai sha ki khynnah pule.
Katkum ka New Education Policy 2020 ka kren shai ba ki samla pule kiba pyndep tang haduh ka semester kaba hynriew kin ïoh ïa ka syrnot ba ki la pass ïa ka Major kaba mut kim lah ban leit sha ka semester kaba hynniew bad phra.
Na ka bynta kito ki samla kiba kwah ban pule ha ka semester kaba hynniew bad kaba phra ha kano kano ka bynta jong ka jingpule, ki don ha ka umdum namar ka NEHU haduh mynta kam pat ai kano kano ka jingbthah kumno ban ïaid sha khmat ïa kane ka jingpule.
Ka eksam ïa kiba la don mynta ha ka semester kaba hynriew kan long ha u bnai Jylliew bad mar ïa dep ïa ka eksam kiba kwah ban dang pule sha ka semester kaba hynniew kin sa sdang ha u Naitung hynrei haduh mynta ka NEHU kam pat ai kano kano ka jingbthah.