Ïaid rally ki kynthei kiba dei ki dkhot ka BJP ban dawa ïa ka 33% women reservation bill

Shillong, Ïaïong 25: Ka BJP Meghalaya Mahila Morcha ha ka sngi Saitjaiñ ka la pynlong ïa ki jingïaid paidbah ha ki jaka bapher bapher ha nongbah Shillong ban pyrshah bad dawa na ki seng kiba don ha ka liang pyrshah ban kyrshan ïa ka 33% women’s reservation bill kaba la wanrah dang shen ha Parliament.
Ïa kane ka jingiakhih da kaba iaid paidbah ha Khyndailad, kaba dei ka jaka pdeng jong ka khaïi pateng jong ka nongbah, kaba la ïalam da ka President ka BJP Meghalaya Mahila Morcha, ka kong Arena Hynniewta ha ka jingïa don lang ryngkat bad ka President jong ka East Khasi Hills District ka kong Priambadah Blah bad kiwei kiwei ki de ki longkmie kiba dei ki dkhot.
Ka kong Hynñiewta ka la pynpaw ïa ka jingsngewskhem ba u Modi u ba ïalam ïa ka sorkar kan long kaba jop ban pynioh ïa ka 33% ka reservation na ka bynta ki kynthei ka ka ri India.
Sa kawei pat ka jingiaid rally paidbah ba la pynlong da ki kynthei kiba dei ki dkhot ka BJP hajan Polo.Ha kane la ïa don lang ka State secretary ka kong Daniela Nonglait, ka kong Susuki Pariat, ka Angie Sangma bad kiwei kiwei.
Ka party ka la ong ba ka la pynlong ïa kane ka jingiaid rally paidbah “da kaba dawa ba ki seng kiba don ha ka liang pyrshah ba kin kyrshan ïa ka 33% Women Reservation kaba la wanrah ha Parliament dang shen.”
“Ki kynthei kiba dei ki dkhot ka BJP Meghalaya ki la rai ban bteng ïa ki jingdawa jong ki tad haduh ban da ioh ïa ka 33% reservation ha ki bor thaw aiñ ïa baroh ki kynthei ka ri India,” la bynrap shuh shuh ka seng.