Shillong, ïaïong 23: Ka kol ha ka khyllipmat ba la jan artad ka jingïalehkai na u Bankheinlang Rongrin ka la pynlong ïa ka Janepih YSCA ba kan pynliem ïa ka A’chik SCO Rongjeng da tang 1-0 kol ha ka jingïakhun kaba ïakhaid bha ha ka Group G jong ka lympung 5th Meghalaya State League ha Williamnagar hynne ka sngi Palei.
Kane ka dei ka jingjop kaba lai sien lynter jong ka Janepih bad ka dei ruh ka jingïakhun kaba jwat tam na ka bynta jong ki. Ka don mynta ha ka kyrdan ba ha khlieh duh jong ka Group da kaba kamai 9 poiñ bad kim pat shah thep wat tang shi kol ha ki liang pyrshah ha kane ka lympung.
Na ka liang jong ka ASCOR, ka kynhun ka la ïalehkai bha hynrei ka la hap ban pdiang ïa ka nam rem kaba ar hadien lai tylli ki jingïalehkai. Ka la ïoh 3 point bad ka don ha ka kyrdan kaba saw napdeng san tylli ki kynhun ha kane ka Group.
Ka jingïakhun ka la long kaba ïakhaid bha hapdeng kine ki arliang mamla, bad ka jingïalehkai ka la paw kumba kan kut da kaba ïasam mar shi point, hynrei ha ka khyllipmat ba sah sa tang shiphew minit shuwa ban kut ka por, u Bankheinlang u la thep ïa ka namtam kaba la pynjop ïa ka Janepih. Kane ka la jia tang hadien san minit ba la sei madan ïa u na ben shong.
Katkum ka prokram ka la don katto katne ka jingkylla na ka bynta ki jingïalehkai ha ka Group A, ha kaba la thmu ban pynlong ar tylli ki jingïalehkai ha kane ka sngi Thohdieng. Kaba nyngkong kan long ha ka por 1 baje nohphai sngi, hapdeng ka Umkaber SCC bad ka Khimusniang SC. Hadien kata yn pynbud pat da ka jingïakhun hapdeng ka Nongkseh SSCC pyrshah ïa ka Mawshun SCC ha ka por 5 baje janmiet. Baroh kiwei pat ki jingialehkai ha kiwei pat ki Group kin dang sah kumjuh, bad kin sdang ha ka por 3 baje nohphai sngi.
