Na ka bynta ka bha ka miat ka lawei pynlong prokram ïatai ka Thomas Jones Synod College bad ki kmie ki kpa

Jowai, Ïaïong 20 : Ka Thomas Jones Synod College, Jowai mynta ka sngi 20 tarik u Ïaïong, 2026 kala pynlong ïa ka ‘Deliberation Programme’ halor ka phang kaba ong Empowering Tomorrow: An Avenue Towards Excellence” shi bynta ban ïoh ïa phylliew jingmut lang ha ryngkat ki kmie ki kpa jong ki samla pule ka College naka bynta ka bha ka miat jong ka lawei.
Ha kane ka sngi u Symbud Myntri Rangbah ka sorkar jylla u ma Sniawbhalang Dhar ula long kum u kongsan, haka jingdonlang u ma Octomewot Lamin u MDC ba shu sieh kum u symbud kongsan, ka Principal jong ka College Dr. Ailynti Nongbri nalor ki kmie ki kpa jong ki samla pule bad ki nonghikai (lecturer) ka College.
Ïa ka jingïalang la pynïaid da ka R.M Khonglah Assistant Professor jong ka Department of Khasi la ïoh ka jingduwai na u M. Tyngkan Asst. Professor Department of Philosophy, la ïoh ruh ka jingkren na u Rev. I.U.B Pala Chairman Governing Body uba la pynsngew ïa ka jingdonkam ban ïasnohkti lang bad ka College bad la ïoh ruh ka jingrwai na ki samla pule.
Hadien jong kane ka prokram u ma Sniawbhalang Dhar haba ai jingkren sha ki lad pathai khubor ula pynpaw ka jingsngewkmen ban ïadonbynta lang ha kum kane ka sien ba nyngkong ban ïatai bad ïakren sani bha ïa ki jingeh hapdeng ka College bad ki samla pule.
Ula ong kaba nyngkong ka jingeh ka long kum ki kmie ki kpa ki kwah ban pynnang pynstad ïaki khun jong ki, da kaba phah leit pule sha ki kyrdan ba kham shalor, kumta na ka liang ka College bad ki samla pule ruh ki donkam ban ïa pyrkhat lang ha kaba ïadei bad ka bai Admission.
Ula ai jingïaroh ïa ka Thomas Jones Synod College, Jowai kaba la kiew shaphrang khamtam ha ka liang ka jingai jingnang jingstad sha ki samla pule bad kaba la pynmih shibun ki khlur ba phyrnai.
Ha ka liang ka jingdonkam jong ka College ula pyntip ka sorkar kan ïarap katba lah ïa ki jingdonkam naduh ka tulop jong ki nonghikai (Additional Grant), ka building bad ka Auditorium jong ka College kaba don mynta palat 2 hajar ki samla pule.
U ma Octomewot Lamin MDC ba shu sieh ha ka jingkren ula ai khublei kypang ïa ka College kaba la pynlong ïa kane ka prokram ban pynkhlaiñ ïaka lawei ban kiew shaphrang da ka jingïatreilang.
Ula ong ban pynkhlaiñ naduh tynrai donkam ka jingïadei hapdeng ki kmie ki kpa bad ki samla pule ban pynïaid shaphrang ïaka pule puthi, kaba donkam shuh shuh ka long ka akor ka burom bad ka jingnang jingstad jong ka lawei ki khun.
Na ka liang ki kmie ki kpa kila shim bynta ban ïatai lang ha kane ka sngi, katba ïa ki kyntien ai khublei la ïoh na u W.E.H. Lamin Vice Principal jong ka College.