Ka sorkar pdeng ka dei ban ïasyllok ïa baroh ki Niam bad ki tnad pule shwa ban pynkylla ïa ka FCRA : Hek

Shillong, Iaiong 20 : U Nongïalam ka BJP bad MLA ka Pynthorumkhrah u bah AL Hek u la kyntu ïa ka sorkar pdeng ban khot da ka jingïalang ban ïasyllok , ïamir jingmut bad ïatai sani bha shwa ban wanrah ïa kano kano ka jingpynkylla (amendment) ïa ka Foreign Contribution (Regulation) Act Bill ha ïing Dorbar Thawaiñ Parliament, namar ban shu pynkylla khlem ka jingïasyllok kan ktah ïa ka jingsngew jong ki jaitniam bapher bapher bad wat kiba seng ïa ki tnad pule bapher bapher ruh.
“ Halor kane ka jingthmu ban wanrah jingpynkylla ha ka FCRA Bill nga kyntu ïa ka sorkar pdeng ban khot jingïalang bad ïasyllok ne ïamir jingmut lang bad baroh kiba ïadon bynta lang ne shah ktah lang na kane ka aiñ. Ka sorkar pdeng ka dei ban sngap ïa ka jingai jingmut bad jingsngew jong ki Niam bapher bapher shwa ban wanrah ïa ka Bill hapoh Parliament” ong u bah Hek.
Ula ïathuh ba kiba bun ki nongïalam ki la sngewartatien lypa halor kane ka jingthmu ka sorkar pdeng ban wanrah jingpynkylla ha kane ka Aiñ.
“ Ngi la ïakynduh ïa kiba bun ki Nongïalam bad ki la pynpaw ba lada ïa kane ka Bill la ai jingmynjur khlem kano kano ka jingïamir jingmut kan buh ha ka jingeh kaba khraw ïa ki Niam bad ki tnad pule bapher bapher khamtam ïa ki Khristan kiba pynïaid ïa ki hospital, ki skul, ki college bad ki University.Kan buh ha ka jingeh kaba khraw bad halor kane nga la dep ai da ka jingthoh ruh sha u Myntri Rangbah duh ka ri u Narendra Modi” ong u bah Hek.
Nga la ïakynduh ruh ïa ki Nongïalam bapher bapher ka sorkar pdeng bad phah ïa kane ka shithi sha u Myntri Rangbah duh da kaba kyrpad ïa u ban khot ïa ka jingïalang ba kyrpang jong baroh ki Niam ban ïakren bad ïatai halor kane ka Bill” pynkut u bah Hek.